Toshkent hokimi Jahongir Ortiqxo‘jayev 2021-yil yakuniga qadar poytaxtdagi barcha buzilgan ko‘chmas mulklar uchun kompensatsiyalar to‘liq to‘lab berilishini ma’lum qildi. Bu haqda hokimning 19-dekabr kuni o‘tkazilgan matbuot anjumanidagi so‘zlariga tayanib “Gazeta.uz” xabar berdi.
Hokimning so‘zlariga ko‘ra, bu yili hokimiyat 2005-yildan buzilgan ko‘chmas mulklar egalariga pul to‘lab bergan.
“O‘zbekiston tarixida bir yilda buncha kompensatsiya to‘lab berilmagan… Bu yil juda katta miqdorda — 700—800 milliard so‘m pul yer ko‘rinishida ‘snos’ga (kompensatsiya to‘lashga) ketdi. Bizning hisoblarimiz bor, oldimizga qo‘ygan maqsad 2021-yilda 2005-yildan buzilgan binolar uchun hech kim to‘lovsiz qolmaydi. Lekin adolatli, sudning qarori bo‘lsa, narxlar tafovuti to‘g‘ri bo‘lgan bo‘lsa, birortasi qolmaydi. Pul bera olmasak, yer ko‘rinishida beramiz, yer bera olmasak, boshqa yo‘l bilan to‘lab beramiz”, — deya ta’kidladi shahar hokimi.
“Agar bundan keyin davlat ehtiyojlari uchun (ko‘chmas mulk — tahr.) buziladigan bo‘lsa, kerakli kompensatsiya uchun qo‘limizda pulimiz yoki yerimiz bo‘lgandan keyin egasining roziligi bilan buzishga qaror qilamiz. Oldingidagidek ishlar qilmaslikka biz harakat qilamiz va oldimizga shuni prinsipial maqsad qilib qo‘ydik”, — dedi Ortiqxo‘jayev.
Hokimiyatlar kompensatsiya to‘lovlarini moliyalashtirish manbayini aniqlamay turib uy-joy va boshqa obyektlarni buzib tashlagani uchun bir necha bor tanqid ostiga olingan edi.
Yaqinda moliya vaziri o‘rinbosari Axadbek Haydarov bilan uchrashuvda Qonunchilik palatasi deputati Rasul Kusherbayev nima uchun 2021-yilgi davlat budjeti loyihasida Vazirlar Mahkamasining davlat va jamiyat ehtiyojlari uchun yer uchastkalarining olib qo‘yilishi munosabati bilan jismoniy va yuridik shaxslarga yetkazilgan zararlarni qoplash bo‘yicha markazlashtirilgan jamg‘armasiga atigi 150 milliard so‘m ajratilishi belgilangani haqida savol bilan murojaat qilgan edi.
“Bu summa qayerdan kelib chiqdi? Sababi amaldagi real ehtiyojga qaraganda juda ham kam summa qo‘yilgan. Masalan, Toshkent viloyatining bitta tumanining o‘zida, bilaman, 100 milliard atrofida qarzdorlik bor. Haligacha qoplab berilmagan. Joyini buzishga buzib tashlab, hali ham, mana, yotibdi. Na bu joyini ishlata oladi, tadbirkorlik ham to‘xtab qolgan. Bu yerdagi raqam respublika bo‘yicha ikkita yoki uchta tumanni qoplaydi. Hokimiyatlar bilan qanchadan beri bahslashamiz, ‘budjetda pulimiz yo‘q’, deyapti, lekin joyini buzib bo‘lgan”, — deydi Rasul Kusherbayev.
Moliya vaziri o‘rinbosari 2020-yilning yanvar oyidan boshlab yer uchastkalarini olib qo‘yishning yangi tartibi kuchga kirgani, unga ko‘ra, kelishilgan tovon puli to‘lanmasdan ko‘chmas mulkni buzishga yo‘l qo‘yilmasligini eslatib o‘tgan edi.
Mavzuga doir:
Izoh (0)