Тошкент шаҳар ҳокими Жаҳонгир Ортиқхўжаев 19 декабрь куни пойтахт ҳокимлигида ўтказилган матбуот анжуманида пойтахтда кўплаб кўп қаватли янги уйлар қурилаётганига қарамасдан уйларнинг нархи нега пасаймаётганига изоҳ берди, деб хабар бермоқда «Gazeta.uz».
«Кўпчилик ҳамма ёқ қурилиш, қум ва чанг бўлиб кетди, деб норози бўлди. Агар бугунгача шаҳарда оммавий қурилишларни қилмаганимизда бугунги нархлар ҳам бўлмасди. Биз 2,5—3 йил аввал яқин орада уйларнинг нархи 1 квадрат метри [1500 dollar]дан кам бўлмаслигини тахмин қилганмиз. Хабарингиз бўлса, шаҳарда уйларни 2—3 та компания қурарди. Уйларни сотиш офислари бўлмас эди. Таниш топиб, қайсидир офисга боришингизга тўғри келарди, у сизни кутиб олиб, тортмани очиб пулнинг 50 фоизини қўйишни сўрарди ва уйни битганда олишингизни айтарди», — деган у. Ҳозир эса савдо офислари пайдо бўлгани, хизмат сифати ошиб, 3 йил ичида бўлиб тўлаш имконияти пайдо бўлганини таъкидлаган.
Матбуот анжуманида ҳоким уйларнинг нархи 1 квадрат метри 1,5 миллион сўмдан кам бўлмаслигини прогнозини қилганмиз деб айтган. Бироқ «Gazeta.uz»нинг ҳокимлик матбуот хизматига боғланиб аниқлик киритишича, ҳоким аслида 1,5 минг доллар демоқчи бўлган.
Мавзуга доир: Тошкент ҳокими 2021 йил охиригача «снос»лар бўйича барча қарзларни тўлашга ваъда берди
Жаҳонгир Ортиқхўжаэв юқорида айтиб ўтилганларни инобатга олган ҳолда лойиҳаларни жадал амалга ошириш, шунингдек, зарур инфратузилмани шакллантириш зарурлигини таъкидлаган.
Иқтисодий тадқиқотлар ва ислоҳотлар маркази томонидан кўп қаватли уйларда 2019 йил мартидан 2020 йил мартигача ўтказилган уй-жой нархлари таҳлилига кўра, Тошкентдаги уйларнинг ўртача квадрат метри нархи ушбу даврда 639,4 долларни ташкил этди. Туманлар бўйича энг юқори нарх Юнусобод ва Шайхонтоҳур туманларида — мос равишда 699 ва 694 доллар бўлган. Энг паст нархлар Бектемир ва Сергели туманларида қайд этилган — 405 ва 411 доллар.
Октябрь ойида Ўзбекистонда 455 та кўп қаватли бино авария ҳолатида эканлиги маълум қилинганди. 2021—2023 йилларда авария ҳолатидаги кўп қаватли уйлар ўрнида янги уйлар қуриш режалаштирилмоқда.
Изоҳ (0)