Rossiya elchisi: O‘zbekiston YEOIIda mustaqilligini yo‘qotishi haqidagi gaplar kulgili

Rossiyaning O‘zbekistondagi elchisi Vladimir Tyurdenev respublika Yevrosiyo iqtisodiy ittifoqi (YeOII)ga kuzatuvchi sifatida qo‘shilganiga izoh berdi, deb xabar qiladi Sputnik.

Rossiya elchisi so‘zlariga ko‘ra, YeOII to‘laqonli a’zolari ega bo‘lgan imtiyozlar yo‘q bo‘lishiga qaramay, Toshkentda iqtisodiyot uchun hech qanday majburiyat va xatarlarsiz YeOII faoliyatini ichkaridan o‘rganish imkoniyati paydo bo‘lgan.

“Ha, respublika ovoz berish huquqiga va savdo imtiyozlariga ega emas. Ammo ayni paytda uning iqtisodiyoti uchun hech qanday xavf ham yo‘q. Bu yaqindan ko‘rib chiqish va tanlov qilish uchun imkoniyat. Agar vaziyatni baholasak, unda O‘zbekistonning asosiy savdo aylanmasi aynan YeOII mamlakatlari bilan bog‘liq ekanini, eng muhim transport yo‘laklari ittifoq hududidan o‘tishini, migratsiya yo‘nalishi muhim ahamiyatga ega ekanini ko‘rish mumkin. Har qanday holatda ham bu jarayon tez yuz bermaydi, bu faqat birinchi qadam”, — deydi Vladimir Tyurdenev.

Shuningdek, uning ta’kidlashicha, skeptiklarning “YeOIIga integratsiyalashuv jarayonida mustaqillik yo‘qotilishi mumkin” degan bayonotlari haqiqiy ko‘rsatkichlar fonida kulgilidir.

“Ittifoqqa qo‘shilgan birorta ham davlat o‘z mustaqilligini yo‘qotmadi, aksincha, ko‘proq imkoniyatlarga ega bo‘ldi. Bundan tashqari, bu ma’lum bir ishtirokchining miqyosiga qaramaydigan, hamma uchun bir xil bo‘lgan teng huquqli ittifoq”, — deya qo‘shimcha qiladi diplomat.

U Rossiya ham, YeOII boshqa a’zolari ham yangi a’zolarning integratsiyasi iqtisodiyot va ishlab chiqarish sohasiga zararli ta’sir ko‘rsatishidan manfaatdor emasligini ma’lum qilgan. Bunday mintaqaviy loyihalarga qo‘shilish — bu ittifoq a’zolarining o‘zaro murosalari to‘plamidir.

“Shunga qaramay, YeOII nafaqat Rossiya, balki o‘z iqtisodiy sharoitlariga ega bo‘lgan bir nechta davlatlardan iborat. Masalan, Qirg‘izistonni, YeOIIga a’zo bo‘lgan vaqtida, iqtisodiyot darajasi bo‘yicha O‘zbekiston bilan taqqoslash qiyin. Bu shuni anglatadiki, ushbu bosqichda hamma bunday integratsiyadan nimani olishini aniq tushunishi kerak, shunda bu tomonlarning har biri uchun foydali bo‘ladi”, — deydi Tyurdenev.

Avvalroq Vladimir Tyurdenev O‘zbekistonda atom elektrostansiyasini qurish bo‘yicha Rossiya bilan shartnoma “deyarli tayyor”ligi, faqat texnik jihatlar qolganini ma’lum qilgandi. “O‘zAtom” agentligi esa Rossiya elchisining so‘zlariga munosabat bildirib, hozirda O‘zbekistonda birinchi atom elektr stansiyasini qurish bo‘yicha asosiy shartnoma yuzasidan muzokaralar davom etayotganini ta’kidlagan.