Axborot va ommaviy kommunikatsiyalar agentligida o‘tkazilgan anjumanda Davlat soliq qo‘mitasi raisi o‘rinbosari Fazliddin Umarov kirakashlik bilan shug‘ullanayotganlar nima uchun o‘zini o‘zi band qilgan fuqarolar ro‘yxatiga kiritilmagani haqidagi savolga javob qaytardi.
“Ushbu masala juda ham muhim va dolzarb hisoblanadi. Barcha hududlarda taksi xizmatini ko‘rsatuvchi fuqarolar ko‘p. Ularning faoliyatiga qonuniy sharoit yaratilsa, ularning ijtimoiy muammolari ham hal bo‘ladi.
Lekin kirakash o‘zini o‘zi band qiluvchi sifatida ro‘yxatdan o‘tsa, aholining xavfsizligini ta’minlash bilan bog‘liq masala yuzaga keladi. Ya’ni aholi tashish bilan shug‘ullanuvchi korxonalarga qo‘yiladigan talablarni har bir o‘zini o‘zi band qilgan kirakash ham bajarishi kerak degan masala ko‘tarilgan va 67 talik ro‘yxatdan chiqarib tashlangan.
Lekin bu degani bu borada ish to‘xtab qoldi, degani emas. Ushbu masala bo‘yicha maxsus ishchi guruhi tuzilgan hamda maqbul yechim izlanyapti. Lekin bu voqea qachon ro‘y berishi haqida aniq javob ayta olmayman”, — deydi Umarov.
Oktabr oxirlarida Prezident Shavkat Mirziyoyev “Yashirin iqtisodiyotni qisqartirish va soliq organlari faoliyati samaradorligini oshirish bo‘yicha tashkiliy chora-tadbirlar to‘g‘risida”gi farmonni imzolagani to‘g‘risida xabar berilgandi. Mazkur farmon loyihasi va uning imzolangan versiyasi taqqoslanganida, undan bir nechta band, jumladan, jismoniy shaxslarga o‘zini o‘zi band qilish uchun yo‘lovchilarni tashishga ruxsat berish to‘g‘risidagi band joy olmagani ma’lum bo‘lgandi.
Mavzuga doir: O‘zbekistonda taksi faoliyati uchun litsenziyani avtomatik olish tartibi joriy etilishi mumkin
Izoh (0)