Qashqadaryo viloyati Qarshi shahridagi xususiy ta’lim markazida tahsil oluvchi 13 nafar voyaga yetmagan bola is gazidan zaharlangani haqida xabar berilgandi. “Sevimli” telekanalining “Zamon” dasturida ma’lum qilinishicha, bolalarning aksariyatiga uyiga javob berilgan.
Ma’lum qilinishicha, Respublika shoshilinch tibbiy yordam ilmiy markazi Qashqadaryo filialiga soat 06:50 larda Qarshi shahridagi xususiy o‘quv markazlaridan birida tahsil olayotgan 13 nafar o‘smir olib kelingan.
Bolalarning kattasi 14 yoshda bo‘lsa, kichigi 11 yoshda bo‘lgan. Ularga is gazidan zaharlanish tashxisi bilan tez tibbiy yordam ko‘rsatilgan.
Shifoxonaga olib kelingan og‘ir ahvoldagi 3 nafar bola reanimatsiya bo‘limiga, 5 nafari toksikologiya bo‘limiga, qolgan 5 nafari ambulator nazoratiga olingan.
Shifokor O‘rol Shaminovning ma’lum qilishicha, shifoxonaga olib kelinganlarning ahvoli dastlab o‘ta og‘ir bo‘lgan. Ayni vaqtda bir bemor toksikologiya bo‘limiga o‘tkazilgan, 2 nafar bemorning ahvoli qoniqarli.
Dastlabki ma’lumotlarga ko‘ra, xususiy o‘quv markazlariga tegishli yotoqxonalardan birida gaz bilan ishlaydigan isitish qozonidagi nosozlik ushbu hodisaga sabab bo‘lgan.
Holat yuzasidan viloyat favqulodda vaziyatlar boshqarmasi hamda tegishli idoralar tomonidan surishtiruv ishlari olib borilmoqda.
Avvalroq Qoraqalpog‘istonda bir oilaning 4 nafar a’zosi va 2 nafar mehmon hamda Sirdaryoda 31 yoshli ayol va uning voyaga yetmagan 3 nafar farzandi is gazidan zaharlanib vafot etgani haqida xabar berilgandi.
Izoh (0)