Toshkentda Taxtapul mavzesidagi “tankodrom” ko‘prikning to‘xtab qolgan ta’miri bir oyga qolmay yakunlandi

Toshkent shahrining Ahmad Donish ko‘chasidan kichik halqa avtomobil yo‘li, Miskin va Usta Shirin ko‘chalari kesishmasidagi avtomobillar uchun mo‘ljallangan yo‘l o‘tkazgichda kapital ta’mirlash ishlari yakunlanib to‘liq harakat yo‘lga qo‘yildi. Bu haqda “O‘zbekiston temiryo‘llari” AJ xabar berdi.

“Ushbu yo‘l o‘tkazgich 2000-yilda qurilgan. Umumiy uzunligi 912 metr, eni esa 29 metr, konstruksiya qismi 660 metr, yondashish yo‘llarining uzunligi 252 metr bo‘lgan ko‘prik ishga tushirilgandan buyon ta’mirlash ishlari amalga oshirilmagan. Shu sababli yo‘l o‘tkazgichning qatnov qismidagi temir-beton konstruksiyalar, g‘ildirak qaytargichlar, bezak plitalari, metall to‘siq panjaralari, asfalt-beton qoplamalari hamda taroqsimon ko‘rinishidagi deformatsion choklari yaroqsiz holga kelib qolgandi”, — deyiladi xabarda.

Yo‘l o‘tkazgichni mukammal ta’mirlash ishlarini olib borishda, asosan, qatnov qismidagi temir-beton konstruksiyalar almashtirilgan va ostki fazosidagi konstruksiya qismlari balkalar, rigellar hamda tayanch ustunlari, temir-beton qoplamalarining buzilgan joylari qayta tiklangan. Yo‘l o‘tkazgichning qatnov qismidagi yo‘lni ajratib turuvchi quyma betonbloklar o‘rnatilib, asfalt-beton qoplamasi yotqizilgan.

Mazkur yo‘l o‘tkazgichni ta’mirlash ishlari 2019-yil kuz oylarida boshlangan va unga 21 milliard so‘m mahalliy budjet hisobidan ajratish belgilangan edi. 2019—2020-yillardagi qish mavsumida ta’mir ishlari to‘xtatilgandi. Ta’mirlash ishlari to‘xtatilishi sabab haydovchilarga noqulaylik tug‘ilishi oqibatida keng jamoatchilik muhokamasiga sabab bo‘lgan.

Poytaxt hokimligi 30-noyabrda yo‘l ta’mirlash ishlarini tezlashtirish maqsadida ushbu yo‘l o‘tkazgichda avtomobillar qatnovini cheklagan edi. Xabarda avtomobillarning yo‘l o‘tkazgich bo‘ylab bir tomonlama harakati 6-dekabrga qadar davom etishi ta’kidlangan edi.