“O‘zAtom” Rossiya elchisining AES haqidagi gaplarini rad etdi. Hali kelishuvga erishilmagan

Rossiyaning Toshkentdagi elchisi Vladimir Tyurdenev O‘zbekistonda atom elektrostansiyasini qurish bo‘yicha Rossiya bilan shartnoma “deyarli tayyor”ligi, faqat texnik jihatlar qolganini ma’lum qilgandi. “O‘zAtom” agentligi Rossiya elchisining so‘zlariga munosabat bildirib, hozirda O‘zbekistonda birinchi atom elektr stansiyasini qurish bo‘yicha asosiy shartnoma yuzasidan muzokaralar davom etayotganini ta’kidladi.

Hozirda O‘zbekiston va Rossiya tomonidan tashkil etilgan ishchi guruhlar tomonidan O‘zbekistonda atom elektr stansiyasini qurish bo‘yicha asosiy shartnoma shartlarini muhokama qilish bo‘yicha doimiy muzokaralar o‘tkazib kelinmoqda.

Ushbu shartnomani muhokama qilishda O‘zbekistonning milliy manfaatlarini inobatga olgan holda muzokara pozitsiyalari ishlab chiqilgan va himoya qilib kelinmoqda.

Hozirda tomonlar loyihaning xavfsizligi va ishonchliligi hamda iqtisodiy samaradorligini oshirish, shuningdek, respublikaning milliy manfaatlaridan kelib chiqqan holda pozitsiyalarini yaqinlashtirish bo‘yicha muzokaralarni davom ettirmoqdalar.

Bundan tashqari, AESni joylashtirish maydonchasiga tegishli ruxsatnoma olish maqsadida obyektni joylashtirish bo‘yicha ustuvor maydonchada keng ko‘lamli muhandislik tadqiqot ishlari amalga oshirilmoqda va AES qurilishi hamda undan foydalanishning atrof muhitga ta’sirini baholash bo‘yicha hujjat ishlab chiqilgan bo‘lib, ushbu hujjat bo‘yicha o‘rnatilgan tartibda ekspertizadan o‘tkazish hamda jamoatchilik eshittiruvlarini tashkil etish bo‘yicha rejaga asosan ishlar olib borilmoqda.

Tanlangan maydonchada Rossiya tomoni bilan hamkorlikda amalga oshirilayotgan muhandislik tadqiqot ishlari natijalari AES qurilishi bo‘yicha shartnoma shartlarining asosi bo‘lib xizmat qiladi.

“O‘zAtom” agentligi