Monopoliyaga qarshi kurashish qo‘mitasining UzAuto Motors ishi bo‘yicha apellyatsiyasi qanoatlantirilmagani to‘g‘risida xabar berilgandi. “Milliy tiklanish” partiyasi raisi Alisher Qodirov qo‘mita ushbu masalada partiya deputatlari oldida hisob berishi mumkinligini bildirgan. Shundan so‘ng “Milliy tiklanish” partiyasidan Oliy Majlisga saylangan Akmal Saidov partiya rahbari Alisher Qodirovni populistlikda ayblagan edi. 22-dekabr kuni Milliy matbuot markazi binosida “Milliy tiklanish” partiyasining bir yillik faoliyati hisobotiga bag‘ishlab o‘tkazilgan matbuot anjumanida deputat Alisher Qodirov UzAuto Motors AJ atrofidagi tanqidlarga munosabat bildirdi, deb xabar beradi “Kun.uz”.
Alisher Qodirovning so‘zlariga ko‘ra, O‘zbekistondagi avtomobil sanoati 1994-yillarda aholini ish bilan ta’minlash qiyin bo‘lgan sharoitda, odamlarning daromad manbasi yo‘q paytda, Asakada avtomobil ishlab chiqarish zavodi qurilishi bilan boshlangan. U mamlakat iqsitodiyotiga katta madad kuchi sifatida kelgan va umidlar sifatida shakllangan. Uning aytishicha, kompaniya O‘zbekiston yalpi ichki mahsulotida 34 trillion so‘m qiymatlik yaratadi.
“U yerda 28 ming, hatto undan ortiq O‘zbekiston fuqarolari mehnat qiladi. Avtosanoatda yaratilgan bitta ishchi o‘rni turdosh 7—8 tagacha ish o‘rnini paydo qiladi. Masalan, 28 ming odam rasman kompaniyada band bo‘lsa, yana 250 mingga yaqin odam avtosanoat uchun ishlab, non topyapti. Biz O‘zbekistondagi 300 mingga yaqin odamning non topish manbasi haqida gaplashyapmiz”, — deydi Qodirov.
Alisher Qodirov odamlarning avtomobil narxi, xorijiy mashinalarga o‘rnatilgan baland boj to‘lovlariga ham to‘xtalib o‘tgan: “Avtosanoatni hech kim osonlikcha rivojlantirmagan. Avtosanoati mavjud davlatlar esa raqobatda kuchli bo‘ladi. Negaki, ushbu sanoat ilmiy-texnologik rivojlanishga ham turtki beradi. Boj masalasida esa bir nechta davlatlar tajribasiga qarasak, Yaponiya va Janubiy Koreya 80-yillargacha ichki bozorni tamoman yopiq tutgan. Mana shu siyosatning natijasi nimaga olib keldi? Hozir bu davlatlarda ishlab chiqarilgan mashinalar jahon bozorida sotilmoqda. Ular bunga bir kunda erishmadi, balki ma’lum bir muddat ichki bozorni himoya qildi. Bizning tushunchamiz bo‘yicha raqobatga e’tibor qilmadi”.
“Avtomobilni har yili 300 mingga yaqin odam sotib oladi. Biz 300 ming odamning manfaatini ko‘zlab, 35 million xalq yashayotgan mamlakat iqtisodiyotini xavfga qo‘ya olmaymiz. Bu tamoman yopilishga ishora qilmaydi, biz ham milliy zavodning raqobatbardosh bo‘lishini istaymiz. O‘zbekiston Jahon savdo tashkiloti a’zosi emas, lekin Kioto paktiga qo‘shildik. Bu bojlarni muvofiqlashtirish ishi boshlanganini anglatadi”, — dedi u.
“Milliy tiklanish” yetakchisi partiya milliy ishlab chiqaruvchilar manfaatini himoya qilishini eslatib o‘tgan: “O‘zbekistonda avtosanoat rivojlanishda haligacha davom etyapti. U yerda qabul qilinayotgan ayrim qarorlarni yaxshi iqtisodchilar ham tushunmaydi. Masalan, parlamentda davlat budjeti qonuni loyihasi muhokama etilganda yetakchi partiya deputati avtosanoatga berilgan 500 milliard so‘mlik soliq imtiyozini shubha ostiga oldi. Shu soliq imtiyozi nega berilganini rahbariyat yaxshi anglaydi, buning ortida iqtisodiy manfaatlar bor. Aniq iqtisodiy harakat borki, shu sanoatni rivojlantirish kerak”.
“Agar maxfiylik bo‘lsa, demak maxfiylik asosi bor. Bundan tashqari, avtosanoat bozorida raqobat kuchli. U yerda narxlarning shakllanishi bilan bog‘liq tijoriy sirlarni ochiqlamaslik jamiyat nizomi va qonunlarda ham belgilangan”, — deya qo‘shimcha qildi u.
Mavzuga doir: Sud tugadi, muammo esa qoldi. UzAuto Motors va Aksilmonopoliya qo‘mitasi bahsi atrofidagi muhokamalar
Bobur Karimov siyosatchining gaplaridan hayratga tushganini bildirgan: “Butun boshli bir partiyaning rahbari, ozgina bo‘lsa-da, gapiradigan mavzusini tushunsa, barcha uchun manfaatli bo‘lardi”. Bobur Karimovning ushbu so‘zlaridan bir kun o‘tib, Alisher Qodirov yuqorida aytib o‘tilganidek qo‘mitadan hisob so‘rashini aytib chiqdi.
Izoh (0)