Ha, shunaqa bo‘lishi ham mumkin: Samarqand viloyatida ikki sutka davomida 74 soat “svet” bo‘lmadi. Bunda MET javobgarlikni HETga, HET esa METga yuklamoqda

Samarqand viloyatining shahar va tumanlarida 2020-yil 8—9-dekabr kunlari umumiy hisobda 74 soat “svet” bo‘lmadi. Ayrim joylarda 12 daqiqa, boshqa hududlarda salkam sakkiz yarim soatni tashkil etgan ushbu uzilishlarning bari cheklov sabab amalga oshirilgan, deya xabar bermoqda “Daryo” muxbiri Farhod Norbo‘tayev.

Masalan, 8-dekabr kuni Qoradaryo va Narpay hududlariga xizmat ko‘rsatuvchi 110-35 kilovolt kuchlanishli “L-Mehnat” tarmog‘i (podstansiyasi)da 12:20 dan 13:18 ga qadar 58 daqiqalik, 15:34 dan 16:20 gacha 46 daqiqalik, 16:55 dan 18:08 ga 1 soatu 13 daqiqalik — kun davomida jami 2 soatu 57 daqiqalik uzilishlar kuzatilgan. Ushbu uzilishlarning bari SRDS va SAON komandasiga asosan joriy etilgan cheklovlar sabab yuz bergan.

Shuningdek, 9-dekabr kuni Bulung‘ur va Jomboy hududlariga xizmat ko‘rsatuvchi 110-35 kilovolt kuchlanishli “L-Bulung‘ur-2” tarmog‘ida 9:22 dan 13:48 ga qadar 4 soat 26 daqiqalik, 15:29 dan 18:50 ga qadar 3 soat 21 daqiqalik, 21:17 dan 21:30 ga qadar 13 daqiqalik va 23:05 dan 23:30 ga qadar 25 daqiqalik — jami 8 soat 25 daqiqalik uzilish qayd etilgan. Bu uzilishlarning dastlabki ikkitasi rejali uzilish (cheklov) bo‘lsa, keyingi ikkita cheklov SAON tizimining avtomatik buyrug‘i bilan amalga oshirilgan.

Ikki kun davomida kuzatilgan mana shunday uzilishlarning umumiy vaqti jami 74 soatni tashkil etgan. “Daryo” muxbiri ushbu holat bo‘yicha mas’ullardan izoh olishga urinib, yagona “O‘zbekenergo”ning bo‘lib yuborilishi ortidan paydo bo‘lgan “Milliy elektr tarmoqlari” (MET) va “Hududiy elektr tarmoqlari” (HET) kompaniyalari o‘rtasidagi sansalorlikka guvoh bo‘ldi.

Hududlarni elektr ta’minotidan kim uzyapti?

Fayzulla Qurbonov muxbir bilan suhbatda Samarqand hududiy dispetcherlik xizmati “Milliy elektr tarmoqlari”ga qarashli ekani, xizmat 500 va 220 kilovoltli elektr tarmoqlarini boshqarishini, 110-35 kilovoltli tarmoqlar esa (yuqorida ta’kidlanganidek, uzilishlar aynan shu tarmoqlarda yuz bermoqda) “Hududiy elektr tarmoqlari”ning dispetcherlik xizmati tomonidan nazorat qilinishini ta’kidlagan.

Fayzulla Qurbonov bir tomondan 110-35 kilovoltli podstansiyalar METga qaramasligini, boshqa tomondan 500 va 220 kilovoltli podstansiyalardan chiquvchi 110-35 kilovoltli elektr uzatish liniyalariga cheklovlar METga qarashli Samarqand hududiy dispetcherlik xizmati tomonidan amalga oshirilayotgani, biroq bu dispetcherlik xizmati METga qarashli bo‘lsa-da, uning topshiriqlarini bajarmasligini aytgan.

HET vakillari esa elektr iste’moli belgilangan normadan oshganda, korxona boshqaruvidagi 110-35 kilovoltli elektr uzatish tarmoqlari to‘g‘ridan-to‘g‘ri Samarqand regional dispetcherlik xizmatining navbatchi dispetcherlari tomonidan tanlov asosida o‘chirilishini ta’kidladi (yuqorida, Fayzulla Qurbonov ta’kidlaganidek, bu dispetcherlik METga qarashli, lekin, qanchalik g‘alati bo‘lmasin, uning topshiriqlarini bajarmaydi).

“O‘rganish davomida MET ham, HET ham elektr ta’minoti kimning yoki qaysi tashkilotning topshirig‘i asosida o‘chirilayotganligi bo‘yicha aniq ma’lumot berolmadi. Topshiriq qaysi tashkilot tomonidan berilayotganligini sir saqladi”, — deb yozadi Daryo” muxbiri Farhod Norbo‘tayev. Aslida elektrni kim uzayotgani ahamiyatsiz, holat Samarqanddagi aholi, ijtimoiy soha obyektlari va tadbirkorliklarning haqli e’tirozlariga sabab bo‘lmoqda.

Avvalroq Energetika vazirligi 2020-yilda elektr energiyasidagi uzilishlar soni va davomiyligi 2019-yilga nisbatan ikki baravar kamayganini ma’lum qilgan edi. Vazirlik 2020—2021-yillar kuz-qish mavsumida Namangan, Andijon va Farg‘ona viloyatlarida gaz hamda elektr ta’minoti hajmi oshirilishini ham e’lon qilgan edi.

Ayni vaqtda, vazirlik vakillarining ta’kidlashicha, mamlakatda kuzatilayotgan elektr ta’minotidagi uzilishlar energiya iste’molining ortgani bilan bog‘liq. Shuningdek, ayrim hududlarda “svet”ning ko‘p o‘chishi aholining energiya ta’minoti uchun qarzdorligi bilan bog‘liqligi ta’kidlangan.