Ҳа, шунақа бўлиши ҳам мумкин: Самарқанд вилоятида икки сутка давомида 74 соат «свет» бўлмади. Бунда МЭТ жавобгарликни ҲЭТга, ҲЭТ эса МЭТга юкламоқда

Самарқанд вилоятининг шаҳар ва туманларида 2020 йил 8—9 декабрь кунлари умумий ҳисобда 74 соат «свет» бўлмади. Айрим жойларда 12 дақиқа, бошқа ҳудудларда салкам саккиз ярим соатни ташкил этган ушбу узилишларнинг бари чеклов сабаб амалга оширилган, дея хабар бермоқда «Дарё» мухбири Фарҳод Норбўтаев.

Масалан, 8 декабрь куни Қорадарё ва Нарпай ҳудудларига хизмат кўрсатувчи 110-35 киловолт кучланишли «Л-Меҳнат» тармоғи (подстанцияси)да 12:20 дан 13:18 га қадар 58 дақиқалик, 15:34 дан 16:20 гача 46 дақиқалик, 16:55 дан 18:08 га 1 соату 13 дақиқалик — кун давомида жами 2 соату 57 дақиқалик узилишлар кузатилган. Ушбу узилишларнинг бари СРДС ва САОН командасига асосан жорий этилган чекловлар сабаб юз берган.

Шунингдек, 9 декабрь куни Булунғур ва Жомбой ҳудудларига хизмат кўрсатувчи 110-35 киловолт кучланишли «Л-Булунғур-2» тармоғида 9:22 дан 13:48 га қадар 4 соат 26 дақиқалик, 15:29 дан 18:50 га қадар 3 соат 21 дақиқалик, 21:17 дан 21:30 га қадар 13 дақиқалик ва 23:05 дан 23:30 га қадар 25 дақиқалик — жами 8 соат 25 дақиқалик узилиш қайд этилган. Бу узилишларнинг дастлабки иккитаси режали узилиш (чеклов) бўлса, кейинги иккита чеклов САОН тизимининг автоматик буйруғи билан амалга оширилган.

Икки кун давомида кузатилган мана шундай узилишларнинг умумий вақти жами 74 соатни ташкил этган. «Дарё» мухбири ушбу ҳолат бўйича масъуллардан изоҳ олишга уриниб, ягона «Ўзбекэнерго»нинг бўлиб юборилиши ортидан пайдо бўлган «Миллий электр тармоқлари» (МЭТ) ва «Ҳудудий электр тармоқлари» (ҲЭТ) компаниялари ўртасидаги сансалорликка гувоҳ бўлди.

Ҳудудларни электр таъминотидан ким узяпти?

Файзулла Қурбонов мухбир билан суҳбатда Самарқанд ҳудудий диспетчерлик хизмати «Миллий электр тармоқлари»га қарашли экани, хизмат 500 ва 220 киловолтли электр тармоқларини бошқаришини, 110-35 киловолтли тармоқлар эса (юқорида таъкидланганидек, узилишлар айнан шу тармоқларда юз бермоқда) «Ҳудудий электр тармоқлари»нинг диспетчерлик хизмати томонидан назорат қилинишини таъкидлаган.

Файзулла Қурбонов бир томондан 110-35 киловолтли подстанциялар МЭТга қарамаслигини, бошқа томондан 500 ва 220 киловолтли подстанциялардан чиқувчи 110-35 киловолтли электр узатиш линияларига чекловлар МЭТга қарашли Самарқанд ҳудудий диспетчерлик хизмати томонидан амалга оширилаётгани, бироқ бу диспетчерлик хизмати МЭТга қарашли бўлса-да, унинг топшириқларини бажармаслигини айтган.

ҲЭТ вакиллари эса электр истеъмоли белгиланган нормадан ошганда, корхона бошқарувидаги 110-35 киловолтли электр узатиш тармоқлари тўғридан-тўғри Самарқанд регионал диспетчерлик хизматининг навбатчи диспетчерлари томонидан танлов асосида ўчирилишини таъкидлади (юқорида, Файзулла Қурбонов таъкидлаганидек, бу диспетчерлик МЭТга қарашли, лекин, қанчалик ғалати бўлмасин, унинг топшириқларини бажармайди).

«Ўрганиш давомида МЭТ ҳам, ҲЭТ ҳам электр таъминоти кимнинг ёки қайси ташкилотнинг топшириғи асосида ўчирилаётганлиги бўйича аниқ маълумот беролмади. Топшириқ қайси ташкилот томонидан берилаётганлигини сир сақлади», — деб ёзади Дарё» мухбири Фарҳод Норбўтаев. Аслида электрни ким узаётгани аҳамиятсиз, ҳолат Самарқанддаги аҳоли, ижтимоий соҳа объектлари ва тадбиркорликларнинг ҳақли эътирозларига сабаб бўлмоқда.

Аввалроқ Энергетика вазирлиги 2020 йилда электр энергиясидаги узилишлар сони ва давомийлиги 2019 йилга нисбатан икки баравар камайганини маълум қилган эди. Вазирлик 2020—2021 йиллар куз-қиш мавсумида Наманган, Андижон ва Фарғона вилоятларида газ ҳамда электр таъминоти ҳажми оширилишини ҳам эълон қилган эди.

Айни вақтда, вазирлик вакилларининг таъкидлашича, мамлакатда кузатилаётган электр таъминотидаги узилишлар энергия истеъмолининг ортгани билан боғлиқ. Шунингдек, айрим ҳудудларда «свет»нинг кўп ўчиши аҳолининг энергия таъминоти учун қарздорлиги билан боғлиқлиги таъкидланган.