Buyuk Britaniyaning BBC nashri mamlakat sport olamida 2020-yilning eng yaxshilarini aniqladi.
Unga ko‘ra, “Liverpul” bosh murabbiyi Yurgen Klopp Britaniya sport olamida yilning eng yaxshi murabbiyi deb topildi. Mersisaydliklar klubi esa yilning eng yaxshi jamoasi bo‘ldi.
2019/20-yilgi mavsumda “Liverpul” 30 yillik tanaffusdan keyin Angliya chempionligini qo‘lga kiritdi. “Qizillar” eng yaqin ta’qibchidan 18 ochkoga ilgarilab ketgan holda, mavsum tugashiga 7 tur qolganda chempionlikni naqd qildi.
Shu tariqa “Liverpul” 2001-yildan keyin ilk bor BBC talqiniga ko‘ra, “yil jamoasi” deya e’lon qilindi. Klopp esa ushbu sovringa ega chiqqan ko‘plab futbol murabbiylari qatoridan joy oldi. Yaqin o‘tmishda ushbu sovringa Garet Sautgeyt (2018-yil), Klaudio Ranyeri (2016), Arsen Venger (2002 va 2004) hamda Aleks Fergyuson (1999) kabi mutaxassislar loyiq ko‘rilgandi.
Eslatib o‘tamiz, Klopp FIFA talqini bo‘yicha 2020-yilning eng yaxshi murabbiyi deb topilgandi.
Avvalroq yengil vazn toifasida UFC chempioni Habib Nurmagomedov BBC talqini bo‘yicha yilning eng yaxshi (xalqaro) sportchisi deb topilgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)