“Jenoa” klubida bosh murabbiy o‘zgardi. Bu haqda genuyaliklar matbuot xizmati ma’lum qildi.
Jamoaning qoniqarsiz natijalari sabab Rolando Maran iste’foga chiqarilgan.
Uning o‘rnini Davide Ballardini egalladi. 56 yoshli mutaxassis to‘rtinchi marta “Jenoa” bosh murabbiyiga aylandi. Avvalroq u 2010-2011, 2013 va 2017-2018-yillarda jamoani boshqargan.
Eldor Shomurodov jamoasi 2020/21-yilgi mavsumda Italiya chempionatida bor-yo‘g‘i bir marta g‘alaba qozondi. “Grifonlar” 13-turga kelib 8 marta mag‘lubiyatga uchradi va to‘rt bor durang qayd etdi.
Ayni vaqtda “Jenoa” 7 ochko bilan A Seriya musobaqa jadvalida 19-o‘rinda bormoqda.
O‘zbekistonlik 25 yoshli futbolchi Genuya klubi safida 9 ta o‘yin o‘tkazib, bittadan gol va golli uzatma muallifiga aylandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)