Юрген Клопп BBC талқинига кўра 2020 йилнинг энг яхши мураббийи деб топилди, «Ливерпуль» эса — йил жамоаси

Буюк Британиянинг BBC нашри мамлакат спорт оламида 2020 йилнинг энг яхшиларини аниқлади.

Унга кўра, «Ливерпуль» бош мураббийи Юрген Клопп Британия спорт оламида йилнинг энг яхши мураббийи деб топилди. Мерсисайдликлар клуби эса йилнинг энг яхши жамоаси бўлди.

2019/20 йилги мавсумда «Ливерпуль» 30 йиллик танаффусдан кейин Англия чемпионлигини қўлга киритди. «Қизиллар» энг яқин таъқибчидан 18 очкога илгарилаб кетган ҳолда, мавсум тугашига 7 тур қолганда чемпионликни нақд қилди.

Шу тариқа «Ливерпуль» 2001 йилдан кейин илк бор BBC талқинига кўра, «йил жамоаси» дея эълон қилинди. Клопп эса ушбу совринга эга чиққан кўплаб футбол мураббийлари қаторидан жой олди. Яқин ўтмишда ушбу совринга Гарет Саутгейт (2018 йил), Клаудио Раньери (2016), Арсен Венгер (2002 ва 2004) ҳамда Алекс Фергюсон (1999) каби мутахассислар лойиқ кўрилганди.

Эслатиб ўтамиз, Клопп ФИФА талқини бўйича 2020 йилнинг энг яхши мураббийи деб топилганди.

Аввалроқ енгил вазн тоифасида UFC чемпиони Ҳабиб Нурмагомедов BBC талқини бўйича йилнинг энг яхши (халқаро) спортчиси деб топилганди.