Superliga—2021 da nechta jamoa ishtirok etadi? Diyor Imomxo‘jayev javob berdi

Professional futbol Ligasi (PFL) bosh direktori vazifasini bajaruvchi Diyor Imomxo‘jayev Superliga 2021-yilgi mavsumida nechta jamoa ishtirok etishi masalasida fikr bildirdi.

Superligada nechta jamoa ishtirok etadi? Futbol muxlislari o‘rtasida shu savol ko‘tarilishiga sababchi bo‘lgan insonlar oramizda bor ekan, rivojlanish bo‘lmaydi. Quyidagi fikrlarni yaxshilab o‘qib chiqishingizni va shu savol qiynayotgan insonlarga tarqatishingizni so‘rayman.

• 28-noyabr kuni O‘FA Ijroqo‘mi yig‘ilishi bo‘lib o‘tdi va unda PFL vakilining Superligada 14 ta, Pro-Ligada 10 ta klub ishtirok etishi borasidagi taklifi tasdiqlandi. “Aral” klubining istisno tariqasida Pro-Ligada ishtirok etishiga hamma bir ovozdan rozi bo‘ldi. Yig‘ilishda O‘FA prezidenti va Ijroqo‘m a’zolari ishtirok etdi. Keyinchalik O‘FA prezidentining topshirig‘i bilan Murat Kamalov hamda Dilmurod Nabiyev bilan shaxsan suhbatlashdik. Bu insonlarning barchasi Prezident tashabbusi to‘la qo‘llab-quvvatlanishi va albatta, FIFA talablari hurmat qilinishini ma’lum qildi.
• Normativ-huquqiy hujjatlar loyihalari muhokamasi portaliga joylashtirilgan materialda Superliga so‘zi allaqachon Pro-Liga qilib o‘zgartirilgan. Biz hech bo‘lmasa Superliga va Pro-Liga o‘rtasidagi sport prinsiplarini hurmat qilishimiz kerak.
• Bugungi voqealar fonida “Neftchi” muxlislarida ko‘plab savollar paydo bo‘lgani rost. Biz “Neftchi” klubini hurmat qilamiz, uning shonli tarixi haqida yaxshi tasavvurga egamiz. Va umid qilamizki, uning bugungi muxlislari ham Superligaga mard bo‘lib, sport prinsipi bilan chiqishni afzal biladi. O‘z uyida ketma-ket uch o‘yinni boy bergan klubning Superligada paydo bo‘lib qolishi PFL olib borgan shuncha mehnatni bir pul qilibgina qolmay, hammaning kulgisiga ham sabab bo‘ladi.
• Moziyga qaytib ish ko‘rmoq xayrlidir. 2017-yil “Neftchi” Oliy ligada 15-o‘rinni egalladi, ammo Superligada olib qolindi (qaytaga “Mash’al” Superligadan tushirib yuborildi). Bugunimiz aniq ko‘rsatib turibdiki, bundan “Neftchi” hech qanday xulosa chiqarmagan, o‘z mehnatlari bilan elitaga qaytgan “Mash’al” esa bugun undan yaxshiroq holatda. Biz mana shu saboqni unutmasligimiz kerak.

Ha, aytgancha, Superliga ishtirokchilari sonining 16 taga yetkazilishi borasidagi intriga menga ikki yil avvalgi holatni eslatyapti. O‘shanda ikki klub sun’iy ravishda Superligaga qo‘shildi. Ammo bu na “Dinamo”ga foyda keltirdi va na “Surxon”ga. Biz bu kabi ishlarga to‘la qarshimiz. Masalaning qiziq tarafi shundaki, o‘shanda ham mish-mishlar “Surxon” ortida turgan murabbiy sabab bolalagandi. Hozir o‘sha mutaxassis Farg‘onada paydo bo‘lib, ishni yana intrigadan boshlamoqchi ko‘rinadi. Biz Xayrulla Bozorov bilan suhbatda “Neftchi”ni rivojlantirish masalasini muhokama qildik. Men bu insonga ishonaman va umid qilamanki, hammasi tabiiy jarayon bilan ro‘y beradi. “Neftchi”ning uzoq tanaffusdan keyin “Istiqlol”ga qaytganiyoq shuning debochasi edi. Diskvalifikatsiyadan qaytayotganlar esa aql-hushlarini yig‘ib, halol mehnat bilan “Neftchi”ni Superligaga olib chiqadi deb umid bildiraman. Buyog‘iga ularga omad tilaymiz.

2021-yilgi mavsum Superligada 14 ta klub ishtirok etadi!

Diyor Imomxo‘jayev, PFL bosh direktori vazifasini bajaruvchi

Avvalroq Ilhom Mo‘minjonov yangi mavsumdan “Neftchi” bosh murabbiyi etib tayinlanishi haqida xabarlar tarqaldi. Mo‘minjonov 2019-yilning aprelida “Navbahor”da bosh murabbiy bo‘lgan vaqtida kelishilgan o‘yinlarda ishtirok etish va o‘yin natijasiga ta’sir o‘tkazish uchun futbolchilarini o‘yinni sotishga majbur qilish kabi bandlar bilan aybdor deb topilib, 5 yil muddatga futbolga oid faoliyatdan chetlatilgandi. Biroq 2020-yilning fevralida “Surxon” klubining murojaatiga ko‘ra, Etika qo‘mitasi ishni qayta ko‘rib chiqqan va diskvalifikatsiya muddatini qisqartirgandi. Unga ko‘ra, Mo‘minjonov 2021-yilning 1-yanvaridan futboldagi faoliyatini davom ettirishi mumkin bo‘ladi.