Qozog‘istonda Rossiyaning koronavirusga qarshi “Sputnik V” vaksinasi ishlab chiqarila boshlandi, deb xabar bermoqda “Kommersant” respublika hukumati matbuot xizmatiga tayanib. Ishlab chiqarilgan vaksina bilan ommaviy emlash 2021-yil fevralda boshlanadi.
“Qozog‘iston bosh vaziri Askar Mamin Qozog‘iston respublikasi va Rossiya prezidentlari Qosim-Jo‘mart To‘qayev va Vladimir Putin o‘rtasidagi kelishuvlarni amalga oshirish doirasida Qarag‘andi farmatsevtika majmuasiga tashrif buyurib, ‘Sputnik V’ vaksinasini ishlab chiqarishga start berdi”, — deyiladi hukumat xabarida.
Majmua bazasida bosqichma-bosqich 2 million doza vaksina ishlab chiqarish rejalashtirilmoqda, “Sputnik V” bilan ommaviy ravishda ko‘ngilli tarzda emlash 2021-yil fevralida boshlanadi. Birinchi navbatda tibbiyot xodimlari, pedagoglar, talabalar, huquq-tartibot organlari xodimlari, tibbiy-ijtimoiy muassasalar bemorlari, surunkali kasalliklarga ega xavf guruhi vakillari emlanadi.
Qozog‘iston prezidenti Qosim-Jo‘mart To‘qayev Rossiya bilan hamkorlikda vaksina ishlab chiqarilishi boshlanishi haqida aytib o‘tgan edi. Uning so‘zlariga ko‘ra, shuningdek, Qozog‘iston vaksinasi ham ishlab chiqariladi va u eksport ham qilinadi. To‘qayev mahalliy dori sinovda yaxshi natijalar ko‘rsatayotganini aytdi.
Qozog‘istonda COVID-19’ga chalinganlar soni 190 ming, vafot etganlar esa 2,6 ming kishidan oshgan.
Avvalroq Qozog‘istonda ko‘ngillilarni koronavirusiga qarshi mahalliy QazCovid-in vaksinasi bilan emlash boshlangan edi.
Izoh (0)