Koronavirusning yangi, yuqumliroq varianti tufayli 20 dan ortiq mamlakat aviaqatnovlarni chekladi

Buyuk Britaniyada va yana bir qator mamlakatlarda yuqumlilik darajasi 70 foizga ko‘proq bo‘lgan koronavirusning yangi shtammi aniqlangach, 20 dan ortiq mamlakat aviaqatnovlarga cheklovlar kiritdi, deb yozadi Meduza.

BBC News xabariga ko‘ra, Avstriya, Argentina, Belgiya, Bolgariya, Germaniya, Isroil, Eron, Irlandiya, Italiya, Kanada, Kolumbiya, Kuvayt, Latviya, Litva, Marokash, Niderlandiya, Ruminiya, Turkiya, Xorvatiya, Finlyandiya, Fransiya, Chili, Chexiya, Shveysariya, Estoniya turli muddatlarga Buyuk Britaniyadan parvozlarni to‘xtatgan.

Saudiya Arabistoni Ichki ishlar vazirligi vakili ma’lum qilishicha, yangi cheklovlar “ushbu virusning tabiati haqida ma’lum bo‘lmaguncha” amal qiladi. Ular hozircha bir haftaga kiritildi va yana uzaytirilishi mumkin.

Saudiya Arabistoni quyidagi cheklovlarni kiritdi:

• xalqaro aviaqatnov to‘xtatildi. Qirollikka chet eldan kirib kelishga ulgurgan reyslar mamlakatni tark etishi mumkin;
• quruqlik va dengizdagi chegaralar vaqtinchalik yopildi;
• Yevropa mamlakatlaridan yoki koronavirusning yangi shtammi paydo bo‘lgan har qanday davlatdan qaytib kelgan fuqarolar ikki haftaga o‘zini o‘zi yakkalashi, COVID-19’ga test topshirishi va so‘ng bundan har besh kunda o‘tib turishi kerak;
• so‘nggi uch oy ichida Yevropadan yoki koronavirusning yangi shtammi paydo bo‘lgan mamlakatdan qaytib kelganlar ham majburiy tartibda test topshirishi kerak.

Choralar agentlikning sog‘liqni saqlash departamenti tavsiyasi bilan qabul qilindi. U parvozlarning to‘xtatilishini virusni tiyib turish uchun zarur chora deb hisobladi.

Xabarda aniqlik kiritilishicha, yaqin orada koronavirusning yangi turi haqida batafsilroq ma’lumot paydo bo‘lishi mumkin. Yo‘lovchi aviaqatnovlarini davom ettirish masalasi yangi ma’lumotlarga bog‘liq bo‘ladi.

Isroil ham Buyuk Britaniya, Daniya va Janubiy Afrika Respublikasi (JAR)da koronavirusning yangi shtammi aniqlangani sababli ushbu mamlakatlar bilan aviaqatnovni to‘xtatib qo‘ydi.

“Koronavirusning yangi turi Isroilga kirib kelmasligi uchun barcha imkoniyatni ishga solyapmiz. Biz Buyuk Britaniya, Daniya va JARdan keladigan barcha reyslar uchun osmonimizni yopdik. Bu mamlakatlarda mutatsiyaga uchragan koronavirus topilgan. Zarur bo‘lsa, ro‘yxatga boshqa mamlakatlar ham qo‘shiladi”, — deb yozdi Isroil bosh vaziri Binyamin Netanyaxu o‘z Twitter’ida.

Turkiya Buyuk Britaniyadan tashqari, Daniya, Niderlandiya va JAR bilan, Shveysariya ham JAR bilan parvozlarni to‘xtatdi. Shvetsiya Britaniya bilan aviaqatnovni 21-dekabrdan to‘xtatmoqchi.

Buyuk Britaniya Sog‘liqni saqlash vazirligi koronavirusning yangi turi aniqlangani haqida 14-dekabr kuni ma’lum qilgan edi. Angliya bosh sanitar shifokori Kris Uitti bu turdagi virus “odatiy” SARS-CoV-2’dan ko‘ra tezroq tarqalayotganini qayd etdi. Buyuk Britaniya bosh vaziri Boris Jonsonning so‘zlariga ko‘ra, koronavirusning yangi genetik varianti 70 foizga yuqumliroq bo‘lishi mumkin.

Infeksiyaning yangi shtammi aniqlangani munosabati bilan Angliya janubi-sharqida, xususan, Londonda 20-dekabrdan e’tiboran cheklovlarning yuqori, to‘rtinchi darajasi joriy etildi, hozircha bu tartib yaqin ikki hafta amalda bo‘ladi. Unga ko‘ra, mahalliy aholi o‘ta zaruratsiz uydan chiqishi, shuningdek, Yangi yil bayrami tantanalarida bir necha oila bo‘lib to‘planishi mumkin emas. Xavfning to‘rtinchi darajasi e’lon qilingan hududlarda faqat dorixonalar va birinchi zarurat do‘konlari ishlaydi. Xuddi shunday cheklovlar 20-dekabrdan Uelsda, 26-dekabrdan esa Shotlandiyada ham joriy etiladi.

Jahon sog‘liqni saqlash tashkiloti 20-dekabr kuni Britaniyanikiga o‘xshash koronavirus Niderlandiya, Daniya va Avstraliyada ham aniqlanganini e’lon qildi. Avvalroq JARda ham shunga o‘xshash mutatsiyadagi virus topilgani haqida xabar berilgan edi.