Seul hukumati koronavirus infeksiyasi tarqalishining oldini olish maqsadida fuqarolarga besh va undan ortiq odam bo‘lib bir joyda to‘planishni taqiqlab qo‘ydi. Bu haqda Janubiy Koreya rasmiylarining bayonotiga tayanib, Yonhap agentligi xabar berdi.
Mazkur ehtiyot choralari 3-yanvarga qadar amalda bo‘ladi. Yig‘ilishlar, pikniklar, Yangi yil bazmlari, tug‘ulgan kunlar, oilaviy bayramlar taqiqlangan. Shu bilan birga, hukumat 50 kishigacha odamlarni to‘plab, ijtimoiy masofalanishga rioya qilingan holda to‘y va dafn marosimlarini o‘tkazishga ruxsat beradi.
Ushbu choralar poytaxtning barcha tumanlariga, xususan, Seul, Inchxon va Kyongidoga taalluqli.
Eslatib o‘tamiz, noyabr o‘rtalarida Janubiy Koreya Sog‘liqni saqlash vazirligi Seulda koronavirusning uchinchi to‘lqini boshlangani haqida ogohlantirgan edi. Shu munosabat bilan mamlakat bosh vaziri Chon Se Gyun fuqarolardan ommaviy tadbirlarni o‘tkazmaslikni so‘ragan.
Janubiy Koreya SSV ma’lumotlariga ko‘ra, pandemiya boshlanganidan buyon mamlakatda koronavirusga chalinganlar soni 50,6 ming kishiga yetgan.
Avvalroq Janubiy Koreyada 13-noyabrdan boshlab jamoat joylari va transportda niqobsiz yurgan kishilar jarima to‘lashi xabar berilgan edi.
Izoh (0)