Britaniyada koronavirusning yangi shtammi sentabrda paydo bo‘lib, noyabr o‘rtalaridan faol tarqalishni boshlagan

Koronavirusning yangi shtammi Buyuk Britaniyada sentabrda paydo bo‘lgan bo‘lishi mumkin, ammo noyabr o‘rtalarida faol tarqalishni boshlagan. Bu haqda mamlakat Jamoatchilik sog‘lig‘ini saqlash xizmati bayonotiga tayanib, “RBK” xabar bermoqda.

Olimlar genetik ma’lumotlardan foydalanib, koronavirus tarqalishi zanjirini teskari tartibda o‘rganib chiqib, fuqarolar uni kimdan yuqtirganligini aniqlashga urindi.

“Koronavirusning bu turi sentabrda paydo bo‘lgan, noyabr o‘rtalarigacha unga juda kam odamlar chalingan. Koronavirusning aynan yangi variant bilan bog‘liq kasallanish holatlarining o‘sishi birinchi marta noyabr oxirlarida qayd etildi, o‘shanda Jamoatchilik sog‘lig‘ini saqlash xizmati joriy qilingan cheklovlarga qaramay, Kent grafligida kasallanish darajasi pasaymayotgani sababini aniqlagan edi. Keyinroq biz koronavirusning bu variant Londonda va Esseks grafligida tez tarqalayotganini aniqladik”, — deyiladi xabarda.

Koronavirusning yangi turi tezroq tarqaladi, lekin u kasallikning og‘irroq kechishiga olib kelishi yoki u bilan bog‘liq o‘lim darajasi yuqori bo‘lishi borasida hozircha dalillar yo‘q, deya ta’kidlamoqda olimlar. Bundan tashqari, Pfizer kompaniyasining koronavirusga qarshi vaksinasi unga qarshi qanchalik samarali ekanligi ham hozircha noma’lum. Buyuk Britaniya undan foydalanishni dekabr boshida ma’qullagan edi.

Buyuk Britaniya Sog‘liqni saqlash vazirligi koronavirusning yangi turi aniqlangani haqida 14-dekabr kuni ma’lum qilgan edi. Angliya bosh sanitar shifokori Kris Uitti bu turdagi virus “odatiy” SARS-CoV-2’dan ko‘ra tezroq tarqalayotganini qayd etdi. Buyuk Britaniya bosh vaziri Boris Jonsonning so‘zlariga ko‘ra, koronavirusning yangi genetik variant 70 foizga yuqumliroq bo‘lishi mumkin.

Infeksiyaning yangi shtammi aniqlangani munosabati bilan Angliya janubi-sharqida, xususan, Londonda 20-dekabrdan e’tiboran cheklovlarning yuqori, to‘rtinchi darajasi joriy etildi, hozircha bu tartib yaqin ikki hafta amalda bo‘ladi. Unga ko‘ra, mahalliy aholi o‘ta zaruratsiz uydan chiqishi, shuningdek, Yangi yil bayramiga tantanalariga bir necha oila bo‘lib to‘planishi mumkin emas. Xavfning to‘rtinchi darajasi e’lon qilingan hududlarda faqat dorixonalar va birinchi zarurat do‘konlari ishlaydi. Xuddi shunday cheklovlar 20-dekabrdan Uelsda, 26-dekabrdan esa Shotlandiyada ham joriy etiladi. Yangi cheklovlar haqida e’lon qilinishi bilan londonliklar shaharni ommaviy tarzda tark eta boshladi, deya xabar bermoqda Sky News.

Yevropaning bir qator mamlakatlari — Niderlandiya, Belgiya, Avstriya va Italiya kabilar Buyuk Britaniya bilan aviaqatnovlarni to‘xtatishini e’lon qilib ulgurdi. Irlandiya, Fransiya va Germaniya, shuningdek, Isroil ham shunday qaror qabul qilish masalasini ko‘rib chiqmoqda. Bild nashri ma’lumotlariga ko‘ra, Germaniya kansleri Angela Merkel Yevropa Ittifoqidagi hamkasblari bilan Buyuk Britaniyadan Yevroittifoqqa parvozlarni 20-dekabr oqshomidan to 2021-yil 6-yanvarigacha muvofiqlashtirilgan holda taqiqlash bo‘yicha kelishishni rejalashtirmoqda. Bundan tashqari, Yevropa Ittifoqi va JAR o‘rtasidagi aviaqatnovlar cheklanishi, Buyuk Britaniya bilan temiryo‘l va parom aloqasi ham to‘xtatilishi mumkin, deya yozmoqda Meduza.

Jahon sog‘liqni saqlash tashkiloti 20-dekabr kuni Britaniyanikiga o‘xshash koronavirus Niderlandiya, Daniya va Avstraliyada ham aniqlanganini e’lon qildi. Avvalroq Janubiy Afrika Respublikasi (JAR)da ham o‘xshash mutatsiyadagi virus topilgani haqida xabar berilgan edi.