Qozog‘iston hukumati COVID-19 tufayli kiritilgan cheklovlarni kuchaytirishga qaror qildi. Tegishli qaror Qozog‘iston bosh vaziri Asqar Mamin rahbarligidagi idoralararo komissiya yig‘ilishida qabul qilindi. Bu haqda “Kommersant” xabar bermoqda.
2021-yilning yanvar—fevral oylarida o‘tkir respirator virusli infeksiya (O‘RVI) va gripp bilan kasallanish holatlari ortishi fonida koronavirusga chalinish holatlari ko‘payishi xavfi mavjud. Shu sababli quyidagilar qabul qilindi:
- 2020-yil 25-dekabrdan 2021-yil 5-yanvargacha tomosha, sport va boshqa ommaviy tadbirlarni, jumladan, Yangi yil ertaliklari va bayram bazmlarini o‘tkazish taqiqlanadi;
- “Tengiz” konida epidemiologik vaziyat barqarorlashmaguncha cheklovlar kuchaytiriladi;
- chakana savdoda koronavirusga qarshi dori vositalarining narxini o‘rtacha 24 foizga pasaytirish bo‘yicha choralar ko‘riladi.
Shuningdek, hududlar rahbarlariga hududdagi epidemiologik vaziyatdan kelib chiqib zarur cheklovlarni qabul qilish buyurilgan.
Bundan tashqari, jamoat joylari, maktablar va bolalar bog‘chalarining sifatli sanitar ishlov berilishi zarurligiga va emlash punktlarini vaksinatsiyaga hozirlashga e’tibor qaratilgan.
Izoh (0)