Buyuk Britaniyada bir kunda rekord darajada — 35,9 ming kishi koronavirusga chalindi

Buyuk Britaniyada bir kecha-kunduzda 35,9 ming kishi koronavirusni yuqtirib oldi, bu pandemiya davridagi eng yuqori ko‘rsatkichdir. Bir kunda 326 kishi vafot etgan, deb yozadi “Kommersant” hukumat saytiga tayanib.

Bir kun avval qirollikda 27 ming kishi koronavirusga chalingan edi. Bundan oldingi rekord 17-dekabrda qayd etilgan, o‘shanda 35,3 mingta holat aniqlangan edi, ammo unga ilgari texnik xatolik tufayli hisobga olinmagan Uels bo‘yicha ma’lumotlar ham kiritilgan edi.

Buyuk Britaniyada jami kasallanganlar soni 2 million kishidan oshdi. Yetti kun ichida kasallanish holatlari soni 51 foizga o‘sdi. Mamlakatda 67,4 ming kishi koronavirus oqibatida vafot etdi. Yevropada bundan ko‘proq o‘lim holatlari faqat Italiyada aniqlangan.

Buyuk Britaniya Sog‘liqni saqlash vazirligi koronavirusning yangi turi aniqlangani haqida 14-dekabr kuni ma’lum qilgan edi. Angliya bosh sanitar shifokori Kris Uitti bu turdagi virus “odatiy” SARS-CoV-2’dan ko‘ra tezroq tarqalayotganini qayd etdi. Buyuk Britaniya bosh vaziri Boris Jonsonning so‘zlariga ko‘ra, koronavirusning yangi genetik variant 70 foizga yuqumliroq bo‘lishi mumkin.

Infeksiyaning yangi shtammi aniqlangani munosabati bilan Angliya janubi-sharqida, xususan, Londonda 20-dekabrdan e’tiboran cheklovlarning yuqori, to‘rtinchi darajasi joriy etildi, hozircha bu tartib yaqin ikki hafta amalda bo‘ladi.

Jahon sog‘liqni saqlash tashkiloti 20-dekabr kuni Britaniyanikiga o‘xshash koronavirus Niderlandiya, Daniya va Avstraliyada ham aniqlanganini e’lon qildi. Avvalroq Janubiy Afrika Respublikasi (JAR)da ham o‘xshash mutatsiyadagi virus topilgani haqida xabar berilgan edi.