AQSh senati federal hukumatni vaqtinchalik moliyalashtirishni bir kunga uzaytirish to‘g‘risidagi qonun loyihasini ma’qullaganidan keyin amaldagi AQSh prezidenti Donald Tramp shatdaunning oldini olish uchun uni imzoladi. Bu haqda “Kommersant” xabar bermoqda.
Endi uzoq muddatli budjet loyihasini ma’qullash uchun qonun chiqaruvchilarda 24 soat muddat bor.
Bunday qonun loyihasi to‘rtinchi marta qabul qilinmoqda. Hukumatni moliyalashtirish 1-oktabrdan (AQShda yangi moliya yili shu kuni boshlandi) buyon muntazam ravishda uzaytirib kelinmoqda.
Muammo shundaki, kongressda 2021-yil uchun mamlakat budjeti bandlarini kelishib olisholmayapti. Demokratlar va Respublikachilar partiyalari koronavirus infeksiyasi pandemiyasiga qarshi kurash paytida iqtisodiyotni va aholini qo‘llab-quvvatlash masalasida bahslashmoqda.
Shu jumladan, demokratlar nafaqa sifatida har bir kishiga 1200 dollardan ajratilishiga erishishga urinmoqda. Respublikachilar davlat ko‘magini 600 dollargacha pasaytirish tarafdori. Qonun loyihasi tomonidan pandemiya davrida iqtisodiyotni qo‘llab-quvvatlash uchun taklif etilayotgan mablag‘ning umumiy hajmi 900 milliard dollardan oshadi.
The Hill qayd etishicha, Tramp budjet muhokamasida deyarli qatnashmagan, chunki u mamlakatda bo‘lib o‘tgan prezidentlik saylovlari yuzasidan da’volar berish bilan band bo‘lgan.
Agar AQSh budjeti qabul qilinmasa, mamlakatda hukumat ishining to‘xtab qolishi (shatdaun) sodir bo‘lishi mumkin. Oxirgi marta bu 2018-yil dekabrida yuz bergan, o‘shanda shatdaun tufayli 800 mingga yaqin davlat xizmatchilari 35 kunga majburiy ta’tilga chiqarilgan edi, ularning ishidagi to‘xtab qolish esa davlat iqtisodiyotiga taxminan 11 milliard dollarga tushgan edi.
Izoh (0)