АҚШ сенати федерал ҳукуматни вақтинчалик молиялаштиришни бир кунга узайтириш тўғрисидаги қонун лойиҳасини маъқуллаганидан кейин амалдаги АҚШ президенти Дональд Трамп шатдауннинг олдини олиш учун уни имзолади. Бу ҳақда «Коммерсантъ» хабар бермоқда.
Энди узоқ муддатли бюджет лойиҳасини маъқуллаш учун қонун чиқарувчиларда 24 соат муддат бор.
Бундай қонун лойиҳаси тўртинчи марта қабул қилинмоқда. Ҳукуматни молиялаштириш 1 октябрдан (АҚШда янги молия йили шу куни бошланди) буён мунтазам равишда узайтириб келинмоқда.
Муаммо шундаки, конгрессда 2021 йил учун мамлакат бюджети бандларини келишиб олишолмаяпти. Демократлар ва Республикачилар партиялари коронавирус инфекцияси пандемиясига қарши кураш пайтида иқтисодиётни ва аҳолини қўллаб-қувватлаш масаласида баҳслашмоқда.
Шу жумладан, демократлар нафақа сифатида ҳар бир кишига 1200 доллардан ажратилишига эришишга уринмоқда. Республикачилар давлат кўмагини 600 долларгача пасайтириш тарафдори. Қонун лойиҳаси томонидан пандемия даврида иқтисодиётни қўллаб-қувватлаш учун таклиф этилаётган маблағнинг умумий ҳажми 900 миллиард доллардан ошади.
The Hill қайд этишича, Трамп бюджет муҳокамасида деярли қатнашмаган, чунки у мамлакатда бўлиб ўтган президентлик сайловлари юзасидан даъволар бериш билан банд бўлган.
Агар АҚШ бюджети қабул қилинмаса, мамлакатда ҳукумат ишининг тўхтаб қолиши (шатдаун) содир бўлиши мумкин. Охирги марта бу 2018 йил декабрида юз берган, ўшанда шатдаун туфайли 800 мингга яқин давлат хизматчилари 35 кунга мажбурий таътилга чиқарилган эди, уларнинг ишидаги тўхтаб қолиш эса давлат иқтисодиётига тахминан 11 миллиард долларга тушган эди.
Изоҳ (0)