Samarqand viloyati aholisining 10,7 foizi oqova suv xizmati bilan ta’minlangan. Pastdarg‘om, Qo‘shrabot, Kattaqo‘rg‘on, Oqdaryo, Payariq va Ishtixon tumani markazlarida markazlashgan oqova tizimlari umuman mavjud emas. Bu haqda xalq deputatlari Samarqand viloyat Kengashining o‘n to‘qqizinchi sessiyasida viloyat hokimi Erkinjon Turdimov ma’lum qildi, deya xabar berdi “Daryo” muxbiri.
“Eng achinarlisi, viloyat markazi Samarqand shahrida ham 40 mingdan ortiq xonadon oqova tarmoq bilan ta’minlanmagan”, — dedi viloyat rahbari.
Ta’kidlanishicha, 2020-yilning o‘tgan davrida viloyat bo‘yicha 137,7 km.li oqova tarmoqlari tortilgan bo‘lib, Paxtachi tumani markazida sutkasiga 2000 metr kub oqova suvlarni tozalovchi inshoot qurilib, foydalanishga topshirilgan. Natijada tuman markazida istiqomat qiluvchi aholining muammolariga barham berilgan.
Bundan tashqari, ayni kunda viloyatda 4841 km ichimlik suvi tarmog‘i mavjud bo‘lib, shundan 1123,4 km yoki 23,2 foizi ta’mirtalab ahvolda. Mavjud 1872 ta suv qudug‘idan 675 tasi, 1671 ta suv inshootining 551 tasi, 89 ta rezervuarning 19 tasi ham ta’mirtalab ahvolga kelib qolgan.
Sutkasiga 140 ming.m3 quvvatga ega bo‘lgan “Samarqand shahar oqova suvlarini tozalash inshooti” Jahon bankining 10,4 million dollar mablag‘i hisobidan zamon talablari asosida modernizatsiya qilinib, 2021-yil mart oyida foydalanishga topshiriladi. Bundan tashqari, xalqaro moliya institutlari mablag‘lari hisobidan qiymati 117,5 million dollar bo‘lgan viloyatning Pastdarg‘om, Qo‘shrabot, Kattaqo‘rg‘on, Oqdaryo, Payariq va Ishtixon tumanlari markazlarida oqova tizimlari loyihasini amalga oshirish boshlanadi.
Shuningdek, yakunlanayotgan 2021-yilda pandemiya bo‘lishiga qaramasdan viloyatda barcha manbalar hisobidan 735 km suv quvurlari, 6 ta rezervuar va 143 ta suv inshooti 580,3 milliard so‘mga rekonstruksiya qilindi yoki yangidan qurilib foydalanishga topshirilgan.
Mavzuga doir:
Izoh (0)