Bugungi kunda Namangan viloyatidan ketib, xorijda ishlayotganlar soni 63 ming kishini tashkil etmoqda. Bu haqda viloyat hokimi Shavkatjon Abdurazzaqov xalq deputatlari Namangan viloyat Kengashi sessiyasidagi murojaatidan so‘ng o‘tkazilgan matbuot anjumanida ma’lum qildi, deya xabar beradi “Daryo” muxbiri Azizbek Abduvaliyev.
Jumladan, Rossiyada 33 ming, Qozog‘istonda 19 ming nafar namanganlik mehnat faoliyatini olib bormoqda. Pandemiya davrida 51 ming nafar migrant Namanganga qaytib kelgan va ulardan 77 foizi ishga joylashtirilgan.
Viloyat hokimi oyiga 200 dollardan kam pul yuborayotganlarni uyiga qaytarish topshirig‘i berilgani haqida ijtimoiy tarmoqlarda tarqalgan xabarlarga ham izoh berdi.
“Bunday topshiriq ham, bunday o‘lchovlar ham yo‘q. Maqsadimiz aniq — chetda yurgan migrantlarni “kelinglar” deb quruq da’vat qilish emas, balki ularga real ish o‘rinlari va oilasini ta’minlashga yetadigan munosib maosh taklifini berish. Ma’qul bo‘lsa, o‘zlari kelishadi.
Birgina misol, Namanganda o‘nlab kichik sanoat zonalari, 100 dan ortiq yangi uylar qurilyapti. Surishtirib ko‘rdik, kuniga 100 ming so‘mdan berilyapti, ovqati, kelib-ketishi tekin, lekin shunda ham ustalarni kamida bir oy kutishga to‘g‘ri kelmoqda. Bu ish o‘rinlari haqida Rossiya, Qozog‘istonda yurgan hamyurtlarimiz biladimi, degan savol tug‘iladi. Afsuski, ko‘pchiligining xabari yo‘q. Yo‘qsa, oilasidan uzoqda, sovuq ob-havoda yurish ularga ham havas bo‘lmasa kerak. Shu uchun ijtimoiy tarmoqlar orqali Namangandagi bo‘sh ish o‘rinlari haqida e’lonlar, roliklarni ko‘paytirishga harakat qilyapmiz”, — dedi Shavkatjon Abdurazzaqov.
Viloyat hokimiga ko‘ra, Rossiyada ishlash istagini bildirganlar uchun bepul rus tili kurslari yo‘lga qo‘yilgan, talab va maosh yuqori bo‘lgan payvandchi, tokar kabi kasblarga o‘rgatadigan markazlar ochilmoqda. Shuningdek, namanganliklarni kafolatlangan ish o‘rinlariga yuborish bo‘yicha Rossiyaning Sverdlovsk va Samara viloyatlari ish beruvchilari bilan muzokaralar olib borilmoqda.
Izoh (0)