Jinoyat ishlari bo‘yicha Asaka tuman sudi tomonidan “UzAuto motors”ga ishga olib kirib qo‘yaman deb o‘ngga yaqin odamlarni chuv tushirgan sobiq Asaka tuman bandlikka ko‘maklashish markazi inspektori hamda Andijon shahridagi advokatlik byurosi ish yurituvchisiga sud hukmi o‘qildi. Bu haqda “Daryo”ga sudya Alisher Xolboyev xabar berdi.
Ma’lum bo‘lishicha, muqaddam sakkiz marotaba sudlangan 2019-yilning may oyidan 2020-yilning yanvar oyiga qadar Asaka tuman bandlikka ko‘maklashish markazida ishlagan O.Z. bir nechta fuqarolarning ishonchiga kirib, ularni “UzAuto motors” AJ hamda jamiyat negizidagi korxonalarga mansabdor tanishlari orqali ishga joylashtirib qo‘yishini va’da bergan. Odamlarni aldab, firibgarlik yo‘li bilan pora tariqasida yirik miqdordagi pullarni olib, shaxsiy ehtiyojlari uchun sarflab yuborgan.
Jumladan, Asaka tumanida yashovchi fuqaro Gulchiroy Tursunboyevadan farzandi Anvar Ulug‘bekovni jamiyatga ishga joylashtirib qo‘yishini va’da qilib, evaziga 1000 dollar talab qilgan va ulardan 2019-yilning sentabr–oktabr oylarida jami 1100 dollar hamda 1 million 761 ming so‘m pulni firibgarlik yo‘li bilan qo‘lga kiritgan.
Bundan tashqari O.Z. jinoiy harakatlarini davom ettirib, muqaddam Andijon shahridagi advokatlik firmasida ish yurituvchi bo‘lib ishlagan ayol jinoiy sherigi O‘.Yu. bilan til biriktirib, 10 nafar fuqarodan o‘zi va farzandlarini ishga joylashtirishini aytib, jami 15 ming dollar pul mablag‘larini o‘zlashtirgan.
Sud sudlanuvchilar, jabrlanuvchilar va guvohlarning ko‘rsatuvlarini tinglab, ishda mavjud bo‘lgan dalillarga tayanib, sudlanuvchi O.Z.ni Jinoyat kodeksining 168-moddasi 3-qismining “b” bandi (takroran yoki xavfli retsidivist tomonidan firibgarlik), 28,211-moddasi 2-qismining “a” bandi (Pora berish) bilan aybdor deb topgan. Va uni 3 yil muddatga mansabdorlik va moddiy javobgarlik lavozimlarida ishlash huquqidan mahrum qilib, 6 yil 6 oy muddatga ozodlikdan mahrum qilgan. Shuningdek, ayblanuvchi O‘.Yu. ham yuqoridagi moddalar bilan aybli deb topilib, unga nisbatan 2 yil muddatga mansabdorlik va moddiy javobgarlik lavozimlarida ishlash huquqidan mahrum qilish va 5 yil 2 oy muddatga ozodlikdan mahrum qilish jazosi tayinlangan.
Shuningdek, sudlanuvchilar tomonidan 10 nafar fuqaroga yetkazilgan 11 ming dollarga yaqin pul mablag‘lari pora predmeti bo‘lgani sababli, davlat foydasiga solidar tartibda, qolgan 2400 dollar pul mablag‘lari esa jabrlanuvchi G‘.A. hamda G.T.lar foydasiga undirilishi belgilangan.
Izoh (0)