Самарқанд вилояти аҳолисининг 10,7 фоизи оқова сув хизмати билан таъминланган. Пастдарғом, Қўшработ, Каттақўрғон, Оқдарё, Пайариқ ва Иштихон тумани марказларида марказлашган оқова тизимлари умуман мавжуд эмас. Бу ҳақда халқ депутатлари Самарқанд вилоят Кенгашининг ўн тўққизинчи сессиясида вилоят ҳокими Эркинжон Турдимов маълум қилди, дея хабар берди «Дарё» мухбири.
«Энг ачинарлиси, вилоят маркази Самарқанд шаҳрида ҳам 40 мингдан ортиқ хонадон оқова тармоқ билан таъминланмаган», — деди вилоят раҳбари.
Таъкидланишича, 2020 йилнинг ўтган даврида вилоят бўйича 137,7 км.ли оқова тармоқлари тортилган бўлиб, Пахтачи тумани марказида суткасига 2000 метр куб оқова сувларни тозаловчи иншоот қурилиб, фойдаланишга топширилган. Натижада туман марказида истиқомат қилувчи аҳолининг муаммоларига барҳам берилган.
Бундан ташқари, айни кунда вилоятда 4841 км ичимлик суви тармоғи мавжуд бўлиб, шундан 1123,4 км ёки 23,2 фоизи таъмирталаб аҳволда. Мавжуд 1872 та сув қудуғидан 675 таси, 1671 та сув иншоотининг 551 таси, 89 та резервуарнинг 19 таси ҳам таъмирталаб аҳволга келиб қолган.
Суткасига 140 минг.м3 қувватга эга бўлган «Самарқанд шаҳар оқова сувларини тозалаш иншооти» Жаҳон банкининг 10,4 миллион доллар маблағи ҳисобидан замон талаблари асосида модернизация қилиниб, 2021 йил март ойида фойдаланишга топширилади. Бундан ташқари, халқаро молия институтлари маблағлари ҳисобидан қиймати 117,5 миллион доллар бўлган вилоятнинг Пастдарғом, Қўшработ, Каттақўрғон, Оқдарё, Пайариқ ва Иштихон туманлари марказларида оқова тизимлари лойиҳасини амалга ошириш бошланади.
Шунингдек, якунланаётган 2021 йилда пандемия бўлишига қарамасдан вилоятда барча манбалар ҳисобидан 735 км сув қувурлари, 6 та резервуар ва 143 та сув иншооти 580,3 миллиард сўмга реконструкция қилинди ёки янгидан қурилиб фойдаланишга топширилган.
Изоҳ (0)