Uylar, mashinalar va Ronalduga muxlislik. “Manchester Yunayted” ritsari Markus Reshford qanday hayot kechiradi?

O‘zining maydon va (asosan) uning tashqarisidagi namunali ishlari bilan ko‘pchilik futbol ishqibozlarining ko‘nglidan joy ola bilgan Markus Reshford pandemiya vaqtida shu darajada xayrli ishlarni amalga oshirdiki, hatto Britaniya qirolichasi uni maxsus orden bilan mukofotladi. Reshford esa bu bilan cheklanmoqchi emas va oliyjanob ishlarini davom ettirmoqchi. Xo‘sh, bu oliyjanob “ritsar” maydondan tashqarida qanday hayot kechiradi? Quyida aynan mana shu savolga javob berib o‘tamiz.

Uylari

Futbolchi katta maosh olishni boshlashi bilan darhol oilasini 800 ming funt sterlinglik yangi uyga ko‘chiradi. Uyda 6 ta yotoqxona, sauna, bir qancha yuvinish xonasi va bog‘ mavjud.

Ingliz nashrlariga ko‘ra, Markusning yuqoridagidan boshqa yana bir  qiymati 1 million funt sterlingga teng bo‘lgan uyi bor. Cheshir grafligida joylashgan mazkur uydan ham 6 ta yotoqxona, sport zali, bog‘ va garaj o‘rin olgan.

Mashinalari

Reshfordning avtoparkiga ham havas qilsa arzigulik. Uning garajidan Range Rover Sport SVR, Mercedes-AMG GT va Mercedes-AMG63 o‘rin olgan.

Kumirlari

Hozirda Reshford millionlab bolakaylarning kumiri hisoblanadi, ammo bir vaqtlar uning o‘zi ham kumirlarga ega edi. Uning sevimli futbolchisi Krishtianu Ronaldu. Reshfordga portugaliyalikning “Manchester Yunayted”dagi o‘yinlari katta qiziqish uyg‘otgan. Uning so‘zlariga ko‘ra, u har doim Ronalduning to‘pi bilan amalga oshirgan ishlaridan lol qolgan va u kabi bo‘lishni xohlagan. Uning kumirlaridan yana biri “qizil iblislar”ning afsonaviy o‘yinchisi Ueyn Runi bo‘lgan. Intervyularining birida Markus Runi o‘zining goleadorligi tufayli ko‘plab bolalar, shu jumladan o‘zining ham kumiri bo‘lganligini ta’kidlagandi.

Futboldan tashqari qiziqishlari

Futbolchi mashg‘ulot va o‘yinlardan bo‘sh vaqtlarida sayohat qilish, yaxshi film tomosha qilish va video o‘yinlar o‘ynashni xush ko‘radi. Shuningdek, u muntazam ravishda xayriya ishlari bilan ham shug‘ullanadi.

Do‘stlari

Reshfordning futbol olamidagi eng yaqin do‘sti, bu Jessi Lingard. Ular “Yunayted” akademiyasida birga tahsil olgan. Garchi, Jessi Reshforddan besh yoshga katta bo‘lsa ham bu ularning do‘stligida muhim ahamiyat kasb etmaydi.

Shuning Markusning yana bir do‘sti Entoni Marsyaldir. Fransiyalik hujumchi jamoaga qo‘shilgach, ular tezda til topishib ketgan.

Daromadi

4 yil oldingi debyutida yorqin o‘yinlar ko‘rsatganidan keyin “Manchester Yunayted” yigitcha bilan darhol yangi shartnoma imzolaydi. Dastlab u haftasiga 45 ming funt maosh olardi. Bu 2019-yilgacha davom etdi. Shundan so‘ng hujumchining maoshi haftasiga 200 ming funtga ko‘tarildi. Biroq The Telegraph ma’lumotlariga ko‘ra, u bonuslar bilan birga 300 ming funtdan ko‘proq maosh olishi mumkin. Bundan tashqari, reklama shartnomalari ham unga sezilarli darajada daromad keltiradi.