Уйлар, машиналар ва Роналдуга мухлислик. «Манчестер Юнайтед» рицари Маркус Рэшфорд қандай ҳаёт кечиради?

Ўзининг майдон ва (асосан) унинг ташқарисидаги намунали ишлари билан кўпчилик футбол ишқибозларининг кўнглидан жой ола билган Маркус Рэшфорд пандемия вақтида шу даражада хайрли ишларни амалга оширдики, ҳатто Британия қироличаси уни махсус орден билан мукофотлади. Рэшфорд эса бу билан чекланмоқчи эмас ва олийжаноб ишларини давом эттирмоқчи. Хўш, бу олийжаноб «рицар» майдондан ташқарида қандай ҳаёт кечиради? Қуйида айнан мана шу саволга жавоб бериб ўтамиз.

Уйлари

Футболчи катта маош олишни бошлаши билан дарҳол оиласини 800 минг фунт стерлинглик янги уйга кўчиради. Уйда 6 та ётоқхона, сауна, бир қанча ювиниш хонаси ва боғ мавжуд.

Инглиз нашрларига кўра, Маркуснинг юқоридагидан бошқа яна бир  қиймати 1 миллион фунт стерлингга тенг бўлган уйи бор. Чешир графлигида жойлашган мазкур уйдан ҳам 6 та ётоқхона, спорт зали, боғ ва гараж ўрин олган.

Машиналари

Рэшфорднинг автопаркига ҳам ҳавас қилса арзигулик. Унинг гаражидан Range Rover Sport SVR, Mercedes-AMG GТ ва Mercedes-AMG63 ўрин олган.

Кумирлари

Ҳозирда Рэшфорд миллионлаб болакайларнинг кумири ҳисобланади, аммо бир вақтлар унинг ўзи ҳам кумирларга эга эди. Унинг севимли футболчиси Криштиану Роналду. Рэшфордга португалияликнинг «Манчестер Юнайтед»даги ўйинлари катта қизиқиш уйғотган. Унинг сўзларига кўра, у ҳар доим Роналдунинг тўпи билан амалга оширган ишларидан лол қолган ва у каби бўлишни хоҳлаган. Унинг кумирларидан яна бири «қизил иблислар»нинг афсонавий ўйинчиси Уэйн Руни бўлган. Интервьюларининг бирида Маркус Руни ўзининг голеадорлиги туфайли кўплаб болалар, шу жумладан ўзининг ҳам кумири бўлганлигини таъкидлаганди.

Футболдан ташқари қизиқишлари

Футболчи машғулот ва ўйинлардан бўш вақтларида саёҳат қилиш, яхши фильм томоша қилиш ва видео ўйинлар ўйнашни хуш кўради. Шунингдек, у мунтазам равишда хайрия ишлари билан ҳам шуғулланади.

Дўстлари

Рэшфорднинг футбол оламидаги энг яқин дўсти, бу Жесси Лингард. Улар «Юнайтед» академиясида бирга таҳсил олган. Гарчи, Жесси Рэшфорддан беш ёшга катта бўлса ҳам бу уларнинг дўстлигида муҳим аҳамият касб этмайди.

Шунинг Маркуснинг яна бир дўсти Энтони Марсьялдир. Франциялик ҳужумчи жамоага қўшилгач, улар тезда тил топишиб кетган.

Даромади

4 йил олдинги дебютида ёрқин ўйинлар кўрсатганидан кейин «Манчестер Юнайтед» йигитча билан дарҳол янги шартнома имзолайди. Дастлаб у ҳафтасига 45 минг фунт маош оларди. Бу 2019 йилгача давом этди. Шундан сўнг ҳужумчининг маоши ҳафтасига 200 минг фунтга кўтарилди. Бироқ The Telegraph маълумотларига кўра, у бонуслар билан бирга 300 минг фунтдан кўпроқ маош олиши мумкин. Бундан ташқари, реклама шартномалари ҳам унга сезиларли даражада даромад келтиради.