Tashqi mehnat migratsiyasi agentligi hamda Birlashgan Arab Amirliklarining AS Unique Human Resourses Consultant kompaniyasi o‘rtasidagi kelishuvga muvofiq, 2020-yilning 10–18-noyabr kunlari mazkur kompaniya vakillarining O‘zbekistonga tashrifi doirasida fuqarolarni ishga jalb qilish maqsadida Toshkent shahri, Samarqand va Namangan viloyatlarida tanlovlar o‘tkazilgan.
Tashqi mehnat migratsiyasi agentligining xabar berishicha, 16-dekabrda Birlashgan Arab Amirliklarining Apleona Sam Facility Management LLC Saned kompaniyasida vaqtinchalik mehnat faoliyatini amalga oshirish uchun 13 nafar o‘zbekistonlik charter reys orqali jo‘nab ketdi.
Fuqarolar 14–15-dekabr kunlari tibbiy ko‘rikdan o‘tkazilib, ular bilan o‘qitish-ko‘niktirish tadbirlari olib borildi. Fuqarolarning transport, ovqatlanish, hujjatlarni rasmiylashtirish, agarda ishchida kasallik aniqlansa, uning davolanishi ish beruvchi kompaniyalar tomonidan ta’minlanishi belgilangan.
Ular belgilangan epidemiologik talablar va karantin cheklovlariga rioya qilgan holda qo‘riqlash xizmati sohasiga turli obyektlarni qo‘riqlash ishlariga jalb qilinishi ta’kidlangan.
Avvalroq Rossiyaning Astraxan viloyati 2021-yilda O‘zbekistondan 10 ming mehnat migrantini qabul qilishga tayyorligini ma’lum qilgani, Rossiyadagi qurilish ishlarida ishlash uchun 249 nafar O‘zbekiston fuqarosi Irkutsk va Amurga va “Gazprom” zavodi atrofidagi qurilishlarda ishlash uchun 231 nafar o‘zbekistonlik Rossiyaga jo‘nab ketgani haqida xabar berilgandi.
Izoh (0)