Andijon viloyatida Hindistonning Ishan Group kompaniyasi bilan hamkorlikda umumiy qiymati 20 million dollar bo‘lgan kardiologiya yo‘nalishi bo‘yicha tibbiyot instituti va klinikasi tashkil etiladi. Bu haqda viloyat hokimi Shuhrat Abdurahmonov 16-dekabr kuni viloyat xalqiga qilgan murojaatida ma’lum qildi, deya xabar berdi “Daryo” muxbiri.
Andijon hokimi murojaati davomida maktabgacha ta’lim, xalq ta’limi, oliy va o‘rta maxsus ta’lim tizimini yanada rivojlantirish bo‘yicha amalga oshirilayotgan ishlar, erishilgan yutuqlarga to‘xtalgan. Shuningdek, 2021-yilda oliy ta’lim tizimini rivojlantirish bo‘yicha qilinishi rejalashtirilgan ishlar bilan tanishtirgan.
Ma’lum qilinishicha, 2021-yilda Marhamat tumanida qishloq xo‘jaligi yo‘nalishida loyiha qiymati 19,4 milliard so‘m bo‘lgan Andijon tajriba ko‘rgazma maydoni, Andijon davlat universitetida loyiha qiymati 9,7 milliard so‘m bo‘lgan tarjimashunoslik va lug‘atshunoslik innovatsion markazi, Andijon mashinasozlik institutida esa loyiha qiymati 6,5 milliard so‘m bo‘lgan “Yoshlar texnoparki” innovatsion markaz qurilib, foydalanishga topshirilishi mo‘ljallangan.
“2021-yilda Polshadagi Varshava institutining Andijon filiali tashkil etiladi. Ayni paytda hamkorlar bilan tashkiliy ishlarni yakuniga yetkazish ishlari olib borilmoqda. Bundan tashqari, kuni kecha viloyatimizda Hindiston davlatining Ishan Group kompaniyasi bilan birgalikda umumiy qiymati 20 million dollar bo‘lgan kardiologiya yo‘nalishida faoliyat olib boruvchi tibbiyot instituti va klinikasini ochish bo‘yicha kelishuv shartnomalari imzoladik. Yanvar oyida Andijon davlat tibbiyot instituti klinikasi hududida Germaniyaning GIZ xalqaro tashkilotining 1 million Yevro grant mablag‘lari hisobiga endourologiya innovatsion markazini foydalanishga topshirishni rejalashtirganmiz. O‘ylaymizki, ushbu harakatlarimiz yaqin kelajakda o‘z mevasini beradi”, — dedi Shuhrat Abdurahmonov.
Qo‘shimcha qilinishicha, kelgusi yil Andijon viloyatida mavjud muammolar yechimiga qaratilgan 4,3 milliard so‘mlik 11 ta tayyor ilmiy ishlanmalar tashkilotlar bilan hamkorlikda amalga oshiriladi.
Izoh (0)