Qarshi tumani hokimi Maqsuda Mustafoyevasiz o‘tgan Xalq deputatlari tuman kengashining navbatdagi sessiyasida so‘z olgan deputat Narzulla Namozov tuman kengashi deputatlari faqat qo‘l ko‘tarib tasdiqlovchi ekanligini tan oldi, deya xabar berdi “Daryo” muxbiri.
“Xafa bo‘lmanglar-u, hammamiz uxlab yotibmiz. Qarshi tumani deputatlari ham boshqasi ham. Nomiga yuribmiz-da. Toshkentda shunaqa ishlar bo‘lyaptiki, Qarshi tumani Toshkentdan 30 yil ortga qolib ketganmiz. Faqat kelamiz, qo‘l ko‘taramiz, nima bo‘lib, nima qo‘yayotganini ham bilmaymiz”, — dedi Xalq deputatlari tuman kengashi deputati Narzulla Namozov.
Deputatning aytishicha, tumandagi uylar, ijtimoiy soha obyektlari juda sifatsiz qurilmoqda. Deputatlar esa buni nazorat qilishni unutgan.
“Bog‘cha quramizmi, maktab quramizmi — hammasi sifatsiz. Ana Toshkentdan borib o‘rganaylik. Shuni nega biz deputatlar nazorat qilmaymiz. Xalq saylagan deputatlarmiz-ku. Iltimos, nomiga deputat bo‘lmaylik. Hozir uxlaysizlar, keyin uyga qaytasizlar. Ana quruvchi bilganini quryapti. O‘sha uylarda kim yashaydi? Siz bilan biz-ku”, — deya fikr bildirgan deputat.
Narzulla Namozov tuman kengashi deputatlari ishtirokida sessiya tashkil qilib, sessiyaga quruvchilarni taklif qilish lozimligini bildirgan.
“Deputatlarni sessiyaga chaqirib, 2021-yilda nima quriladi, qancha uy quriladi, qanday quriladi? Shuni nazoratga olishimiz kerak. Sal e’tiborga olsak, o‘sha quruvchi ham seskanadi-da, chiroyli quradi. Borsin deputatlar o‘tirib, tayyor bo‘lgan uyni qabul qilsin”, — degan deputat.
Deputatning aytishicha, tumandagi mavjud maktablarning birortasida yetarli darajada shart-sharoit yo‘q. Kuni kecha deputatlar ishtirokida maktablar ko‘zdan kechirilgan. Biroq xo‘jako‘rsinga.
“Biz ko‘p maktablarga bordik. O‘zi nomiga borib, nomiga ko‘rib keldig-u, birorta maktabda sharoit yo‘q. Maktab hojatxonasi bir kilometr narida, maktab o‘quvchilarida hatto o‘ynaydigan to‘p ham yo‘q. 44-maktabga bordikmi? ‘Stolba’si yiqilay deyapti. Birorta bolaning ustiga tushib ketsa-chi? Hech kim qiziqmaydi bu bilan”, — deya kuyinib gapirgan deputat.
Achinarlisi, sessiyada shuncha e’tiroz bildirilsa-da, deputatlardan mas’ullarga birorta ham savol berilmagan. Eng yomoni, deputatlar mas’ullarning OAV vakillari bilan bo‘lgan muloqotini ham tinglashni istamay, sessiyadan so‘ng zalni tark etgan.
Eslatib o‘tamiz, Qarshi tuman kengashi deputati Dilorom Tilakova Xalq deputatlari tuman kengashining 2020-yil sentabr oyidagi sessiyasi haqida gapirib, sessiya paytida xonaga kirib-chiqib yurgani uchun sessiyadagi masala mohiyatini unchalik ham tushunmaganini aytib, tuman sessiyasining odatda qanday o‘tishini oshkor qilgandi.
Izoh (0)