Ташқи меҳнат миграцияси агентлиги ҳамда Бирлашган Араб Амирликларининг АS Unique Human Resourses Consultant компанияси ўртасидаги келишувга мувофиқ, 2020 йилнинг 10–18 ноябрь кунлари мазкур компания вакилларининг Ўзбекистонга ташрифи доирасида фуқароларни ишга жалб қилиш мақсадида Тошкент шаҳри, Самарқанд ва Наманган вилоятларида танловлар ўтказилган.
Ташқи меҳнат миграцияси агентлигининг хабар беришича, 16 декабрда Бирлашган Араб Амирликларининг Apleona Sam Facility Management LLC Saned компаниясида вақтинчалик меҳнат фаолиятини амалга ошириш учун 13 нафар ўзбекистонлик чартер рейс орқали жўнаб кетди.
Фуқаролар 14–15 декабрь кунлари тиббий кўрикдан ўтказилиб, улар билан ўқитиш-кўниктириш тадбирлари олиб борилди. Фуқароларнинг транспорт, овқатланиш, ҳужжатларни расмийлаштириш, агарда ишчида касаллик аниқланса, унинг даволаниши иш берувчи компаниялар томонидан таъминланиши белгиланган.
Улар белгиланган эпидемиологик талаблар ва карантин чекловларига риоя қилган ҳолда қўриқлаш хизмати соҳасига турли объектларни қўриқлаш ишларига жалб қилиниши таъкидланган.
Аввалроқ Россиянинг Астрахан вилояти 2021 йилда Ўзбекистондан 10 минг меҳнат мигрантини қабул қилишга тайёрлигини маълум қилгани, Россиядаги қурилиш ишларида ишлаш учун 249 нафар Ўзбекистон фуқароси Иркуцк ва Амурга ва «Газпром» заводи атрофидаги қурилишларда ишлаш учун 231 нафар ўзбекистонлик Россияга жўнаб кетгани ҳақида хабар берилганди.
Изоҳ (0)