Toshkentning Sergeli tumanida pirotexnika buyumlarining qonunga xilof muomalasi bilan shug‘ullangan 29 yoshli yigitga jinoyat ishi qo‘zg‘atilib, qamoqqa olindi. Bu haqda Toshkent shahar IIBB xabar berdi.
Qayd etilishicha, 29-noyabr kuni, taxminan, soat 23:50 da IIBB xodimlari Mercedes-Benz Vito avtomobili haydab ketayotgan farg‘onalik 29 yoshli O.I.ni to‘xtatgan. Xolislar guvohligidagi tekshiruv natijasida avtomobil yukxonasidan jami 72 million so‘mlik 11 quti pirotexnika buyumlari topilgan.
Holat yuzasidan Sergeli tumani IIO FMB 4-son IIB TB tomonidan Jinoyat kodeksining 250-1 (pirotexnika vositalarining qonunga xilof muomalasi) moddasi bo‘yicha jinoiy ish qo‘zg‘atilgan va O.I.ga nisbatan qamoqqa olish ehtiyot chorasi qo‘llanilgan.
Ayni paytda tergov ishlari davom etmoqda.
Xabarga ko‘ra, jami profilaktik tadbirlar davomida 25-noyabr kuni Toshkent shahar IIBB xodimlari boshqa huquqni muhofaza qilish organlari bilan hamkorlikda pirotexnika buyumlarining noqonuniy savdosi bilan bog‘liq 120 dan ortiq fakt aniqladi. 870 dan ortiq sertifikatlanmagan pirotexnika buyumlari olib qo‘yildi. Huquqbuzarliklarga aloqador 115 nafar shaxsga nisbatan qonuniy choralar ko‘rildi. Sud 13 ta huquqbuzarga nisbatan ma’muriy qamoq jazosini belgiladi, 3 nafar fuqaroga nisbatan jinoiy ish qo‘zg‘atildi, qolgan 108 kishi jarimaga tortildi.
Avvalroq Andijon va Samarqandda noqonuniy pirotexnika vositalari savdosiga chek qo‘yilgani, Ohangaronda noqonuniy tarzda 6800 qutiga yaqin pirotexnika vositalari olib ketayotgan yuk mashinasi aniqlangani xabar berilgan edi.
Izoh (0)