2020-yil boshidan buyon is gazidan zaharlanish va chaqnash holatlari oqibatida 106 fuqaro vafot etgan. Bu haqda Shavkat Mirziyoyev raisligida 16-dekabr kuni o‘tkazilgan videoselektor yig‘ilishida ma’lum qilindi, deya xabar bermoqda “Daryo” muxbiri.
Yig‘ilishda davlat rahbari Favqulodda vaziyatlar vazirligining Yong‘inga qarshi kurashish boshqarmasi faoliyatini tanqidiy ko‘rib chiqish va uni tubdan isloh qilish zarurligini ta’kidladi.
“Joylarda is gazi va chaqnashlar bilan bog‘liq noxush holatlar ortib borayotgani har bir rahbarni o‘ylantirishi kerak. Joriy yilning o‘tgan davrida 56 ta is gazidan zaharlanish va 106 ta chaqnash holatlari ro‘y berib, buning oqibatida 106 nafar fuqaro vafot etgan, 190 nafari zaharlangan va kuyish tan jarohatini olgan. Bugun ham Yangiyo‘l tumanida is gazidan 3 nafar fuqaro olamdan o‘tgan. Bosh vazir Abdulla Aripov Favqulodda vaziyatlar vazirligining Yong‘inga qarshi kurashish boshqarmasi faoliyatini tanqidiy ko‘rib chiqib, uni tubdan isloh qilish va yangi tizim yaratish yuzasidan taklif berishi kerak”, – dedi Shavkat Mirziyoyev.
Tadbirda Prezident mavjud imkoniyatlarni to‘liq safarbar etib, aholi va iqtisodiyot tarmoqlarini energiya resurslari bilan uzluksiz ta’minlash, qish mavsumini betalafot o‘tkazish bo‘yicha mutasaddi tashkilot rahbarlariga vazifalar qo‘ydi.
“Ijtimoiy soha obyektlari, ayniqsa, mehribonlik va muruvvat uylari, maktab, maktabgacha ta’lim va tibbiyot muassasalarida yong‘inga qarshi profilaktika ishlarini o‘tkazish, ularning tayyorgarlik jarayonlarini yanada kuchaytirish bo‘yicha choralar ko‘rish zarur”, – dedi Shavkat Mirziyoyev.
Ma’lumot uchun, 2019-yilning oktabr oyidan 2020-yilning 31-mart kuniga qadar (isitish mavsumida) jami 107 ta noxush holat yuzaga kelgan. Shulardan 52 tasi gaz va havo aralashmasining chaqnashi bilan bog‘liq holatlar bo‘lib, ularda 89 nafar fuqaro kuyish tan jarohatini olgan, 3 nafar fuqaro vafot etgan, shuningdek, 55 ta is gazidan zaharlanish bilan bog‘liq holatlar sodir bo‘lib, ularda 75 nafar fuqaro jabrlangan va 73 nafar fuqaro vafot etgan.
O‘zbekistonda is gazi chaqnashi, is gazidan zaharlanish, havo-gaz aralashmasi chaqnashi bilan bog‘liq holatlar bu yil 2019-yilga nisbatan 22 foizga ko‘paygan.
Izoh (0)