FVV: Is gazi bilan bog‘liq noxush holatlar 2019-yilga nisbatan 2020-yilda ko‘paygan

O‘zbekistonda is gazining chaqnashi, is gazidan zaharlanish, havo-gaz aralashmasi chaqnashi bilan bog‘liq holatlar bu yil 2019-yilga nisbatan 22 foizga ko‘paygan. Bu haqda 17-dekabr kuni Milliy matbuot markazida bo‘lib o‘tgan anjumanda FVV bo‘lim boshlig‘i Abdusami Ahmadov aytib o‘tdi, deya xabar bermoqda “Daryo” muxbiri.

Ma’lum qilinishicha is gazi chaqnashi, is gazidan zaharlanish, havo-gaz aralashmasi chaqnashi bilan bog‘liq 41 ta holat yuz bergan:

• Qoraqalpog‘iston Respublikasida 3 ta;
• Andijon viloyatida 2 ta;
• Buxoro viloyatida 1 ta;
• Jizzax viloyatida 3 ta;
• Qashqadaryo viloyatida 4 ta;
• Navoiy viloyatida 1 ta;
• Namangan viloyatida 4 ta;
• Samarqand viloyatida 7 ta;
• Surxondaryo viloyatida 1 ta;
• Sirdaryo viloyatida 3 ta;
• Farg‘ona viloyatida 5 ta;
• Toshkent viloyatida 4 ta;
• Toshkent shahrida 3 ta holatda noxush holatlar uchragan.

“Ijtimoiy tarmoqlardan bu haqida ma’lumot olish juda oson. Ularni qidirib, yuqoridagi holatlar bo‘yicha bilimlarga ega bo‘lishimiz kerak. Beparvolik oila a’zolarimizning sog‘ligiga va hattoki hayotiga ham xavf soladi. Joyiga chiqib o‘rganilgan paytda, ko‘pincha bir xil muammo uchraydi – dudbo‘ronlarning noto‘g‘ri o‘rnatilishi. Dudbo‘ronlar vertikal tarzda chiqarilishi zarur. Ayrim holatlardagina 70 gradusga bukishga ruxsat beriladi. Uni tirsak bilan bukib, gorizontal holatga o‘tkazib derazadan chiqarish qat’iyan man etiladi. Mana shu narsa oltin qoidaga aylanishi kerak”, – dedi FVV vakili.

Ma’lumot uchun, 2019-yilning oktabr oyidan 2020-yilning 31-mart kuniga qadar (isitish mavsumida) jami 107 ta noxush holat yuzaga kelgan. Shulardan 52 tasi gaz va havo aralashmasining chaqnashi bilan bog‘liq holatlar bo‘lib, ularda 89 nafar fuqaro kuyish tan jarohatini olgan, 3 nafar fuqaro vafot etgan, shuningdek, 55 ta is gazidan zaharlanish bilan bog‘liq holatlar sodir bo‘lib, ularda 75 nafar fuqaro jabrlangan va 73 nafar fuqaro vafot etgan.