O‘zbekiston oliy ta’lim muassasalari talabalar va xodimlari uchun koronavirusga qarshi dorilar sotib oladi. Ta’minotchi — Dori-Darmon aksiyadorlik kompaniyasi. Bu haqda bloger va huquqshunos Xushnudbek Xudoyberdiyev o‘zining Telegram’dagi kanali orqali xabar berdi.
Ma’lum qilinishicha, sog‘liqni saqlash vaziri Abduhakim Xojiboyev va oliy va o‘rta maxsus ta’lim vaziri Inomjon Majidov OTM talabalari va xodimlarini koronavirus infeksiyasidan himoyalashga oid qo‘shma qarorni imzolagan.
Unda talabalar va OTM xodimlari profilaktika uchun gidroksixloroxin va sink preparatini qabul qilishi kerakligi, mabodo koronavirus aniqlangan yoki gumon qilingan bo‘lsa, qo‘shimcha dorilar va tavsiyalar asosida muolajalarga amal qilishi lozimligi ta’kidlangan.
OTMlarga barcha dori vositalarini shartnoma asosida Dori-Darmon AK va uning hududiy filiallaridan sotib olish majburiyati yuklatilgan. Dori vositalarini xarid qilish bilan bog‘liq xarajatlar OTMlarning budjetdan tashqari mablag‘lari hisobidan amalga oshirilishi aytilgan.
Avvalroq Dori-Darmon O‘zbekistondagi o‘qituvchilar va tibbiyot xodimlarini emlash uchun “Sovigripp” va “Flyu-M” grippga qarshi 1 milliondan ortiq dozadagi vaksinalarni sotib olishi haqida xabar berilgan edi.
Izoh (0)