2020 йил бошидан буён ис газидан заҳарланиш ва чақнаш ҳолатлари оқибатида 106 фуқаро вафот этган. Бу ҳақда Шавкат Мирзиёев раислигида 16 декабрь куни ўтказилган видеоселектор йиғилишида маълум қилинди, дея хабар бермоқда «Дарё» мухбири.
Йиғилишда давлат раҳбари Фавқулодда вазиятлар вазирлигининг Ёнғинга қарши курашиш бошқармаси фаолиятини танқидий кўриб чиқиш ва уни тубдан ислоҳ қилиш зарурлигини таъкидлади.
«Жойларда ис гази ва чақнашлар билан боғлиқ нохуш ҳолатлар ортиб бораётгани ҳар бир раҳбарни ўйлантириши керак. Жорий йилнинг ўтган даврида 56 та ис газидан заҳарланиш ва 106 та чақнаш ҳолатлари рўй бериб, бунинг оқибатида 106 нафар фуқаро вафот этган, 190 нафари заҳарланган ва куйиш тан жароҳатини олган. Бугун ҳам Янгийўл туманида ис газидан 3 нафар фуқаро оламдан ўтган. Бош вазир Абдулла Арипов Фавқулодда вазиятлар вазирлигининг Ёнғинга қарши курашиш бошқармаси фаолиятини танқидий кўриб чиқиб, уни тубдан ислоҳ қилиш ва янги тизим яратиш юзасидан таклиф бериши керак», – деди Шавкат Мирзиёев.
Тадбирда Президент мавжуд имкониятларни тўлиқ сафарбар этиб, аҳоли ва иқтисодиёт тармоқларини энергия ресурслари билан узлуксиз таъминлаш, қиш мавсумини беталафот ўтказиш бўйича мутасадди ташкилот раҳбарларига вазифалар қўйди.
«Ижтимоий соҳа объектлари, айниқса, меҳрибонлик ва мурувват уйлари, мактаб, мактабгача таълим ва тиббиёт муассасаларида ёнғинга қарши профилактика ишларини ўтказиш, уларнинг тайёргарлик жараёнларини янада кучайтириш бўйича чоралар кўриш зарур», – деди Шавкат Мирзиёев.
Маълумот учун, 2019 йилнинг октябрь ойидан 2020 йилнинг 31 март кунига қадар (иситиш мавсумида) жами 107 та нохуш ҳолат юзага келган. Шулардан 52 таси газ ва ҳаво аралашмасининг чақнаши билан боғлиқ ҳолатлар бўлиб, уларда 89 нафар фуқаро куйиш тан жароҳатини олган, 3 нафар фуқаро вафот этган, шунингдек, 55 та ис газидан заҳарланиш билан боғлиқ ҳолатлар содир бўлиб, уларда 75 нафар фуқаро жабрланган ва 73 нафар фуқаро вафот этган.
Ўзбекистонда ис гази чақнаши, ис газидан заҳарланиш, ҳаво-газ аралашмаси чақнаши билан боғлиқ ҳолатлар бу йил 2019 йилга нисбатан 22 фоизга кўпайган.
Изоҳ (0)