АҚШ президенти этиб сайланган Жо Байден Пит Буттижни ўз администрациясига транспорт вазири этиб тайинлашни таклиф қилди, деб хабар бермоқда Meduza CNN’га таяниб.
Буттиж АҚШ Демократик партияси кампаниясида Байденнинг рақиби бўлган. Март ойида у сайловлар пойгасидан чиқиб, Байденнинг АҚШ президентлигига номзодини расман қўллаб-қувватлаган.
CNN’нинг қайд этилишича, сайланган президент ўз администрациясига собиқ рақибини лавозимга тайинлаши АҚШ тарихида биринчи марта кузатилмоқда. Агар унинг таклифи Сенат томонидан маъқулланса, Буттиж вазир лавозимини эгаллаган тарихда биринчи очиқ бесоқолбоз бўлади.
Пит Буттиж 2020 йилги президентлик кампаниясида иштирок этишидан олдин 8 йил давомида Индиана штатининг Саут-Бенд шаҳри мери бўлган.
Эслатиб ўтамиз, 15 декабрь куни сайловчилар ҳайъати Жо Байденнинг АҚШ президенти этиб сайланганини тасдиқлади. Байден учун сайловчиларнинг 306 та, Дональд Трамп учун 232 та овози берилган. Ғалаба учун эса 270 та овоз тўплаш керак эди. 23 декабргача сайловчилар ҳайъати овозларидан иборат бюллетенлар Вашингтонга етказилади. 2021 йил 6 январь куни овозлар АҚШ Конгресси Вакиллар палатаси ва Сенатнинг қўшма мажлисида ҳисоблаб чиқилади. 20 январь куни сайланган президентнинг инаугурацияси бўлиб ўтади.
Тожикистон президенти Эмомали Раҳмон, Россия президенти Владимир Путин Жо Байденнинг АҚШ президенти этиб сайлангани билан табриклаган.
Изоҳ (0)