15-dekabrga o‘tar kechasi Boshqirdistonning Abzelilov tumanidagi Ishbuldino qishlog‘ida joylashgan xususiy qariyalar uyida chiqqan yong‘in oqibatida 11 kishi halok bo‘ldi, deb yozadi Meduza.
Bir qavatli yog‘och bino butunlay yonib ketdi, yong‘in maydoni 72 kvadrat metrni tashkil qildi. Pansionatning bir xodimasi va o‘sha yerda yashovchi yana uch kishi jon saqlab qolishga muvaffaq bo‘lgan, binoda bo‘lgan boshqa odamlarning barchasi halok bo‘lgan.
Dastlabki ma’lumotlarga ko‘ra, yong‘inga olovga ehtiyotsizlik bilan munosabatda bo‘lish sabab bo‘lgan bo‘lishi mumkin.
Tergov qo‘mitasi Ishbuldinodagi yong‘in holati yuzasidan ehtiyotsizlik oqibatida o‘lim keltirib chiqarish haqida jinoyat ishi qo‘zg‘atdi (ushbu modda bo‘yicha to‘rt yilgacha ozodlikdan mahrum etilish mumkin).
Abzelilov tumani ma’muriyatida ma’lum qilishlaricha, yong‘in sodir bo‘lgan pansionat qonuniy ishlagan, lekin odamlarni kecha-yu kunduz saqlash huquqiga ega bo‘lmagan. Shuningdek, qayd etilishicha, qariyalar uyida me’yordan ko‘p odam bo‘lgan, bino bir vaqtning o‘zida ko‘pi bilan 10 mijozga xizmat ko‘rsatishga mo‘ljallangan.
Izoh (0)