Turkiya prezidenti Rajab Toyyib Erdo‘g‘on Yangi yil bayramlari davrida — 31-dekabr kuni soat 21:00 dan 4-yanvar soat 05:00 ga qadar mamlakatda komendantlik soati amal qilishini e’lon qildi, deb yozadi Meduza.
“Biz avvalroq ko‘rgan chora-tadbirlar sharofati bilan COVID-19’ga aloqador bemorlar va o‘limlar soni boshqa mamlakatlardagiga nisbatan jiddiy ravishda pasayayotganini kuzatyapmiz”, — dedi Erdo‘g‘on.
Turkiyada 21-noyabrdan dam olish komendantlik soati amal qilib kelmoqda. Dastlab cheklovlar faqat kechki va tungi vaqtlarga taalluqli edi, ammo 30-noyabrdan kecha-yu kunduz amal qilmoqda. Qoidabuzarlar jarimaga tortiladi.
Dam olish kunlari komendantlik soati e’lon qilinganidan keyin Turkiya IIV bu choralar sayyohlar uchun amal qilmasligini bildirdi. Yangi yil bayramlarida sayyohlar komendantlik soatiga rioya qilmasligiga ruxsat etiladimi-yo‘qmi — bunga mamlakat hukumati aniqlik kiritganicha yo‘q.
Turkiya hukumati mamlakatda bir kecha-kunduzda 229 kishi koronavirusdan vafot etganidan keyin Yangi yil bayramlari davridagi komendantlik soati haqida e’lon qildi — bu butun pandemiya davridagi eng yuqori ko‘rsatkichdir.
Pandemiya boshidan buyon Turkiyada 1,8 milliondan ortiq kishi koronavirusga chalingan. Ayni paytda mamlakatda 216 ming kishi kasallikni boshidan o‘tkazmoqda, yana 16 ming kishi vafot etgan, 1,6 milliondan ziyod odam esa sog‘aygan.
Mavzuga doir:
- Turkiya sog‘liqni saqlash vaziri Rossiya vaksinasidan voz kechilgani haqidagi xabarlarni rad etdi
- O‘zbekiston va Turkiya qurilish mutaxassisligiga ega migrantlarni ish bilan ta’minlash to‘g‘risida kelishuvga erishdi
- Turkiyada 2016-yildagi davlat to‘ntarishiga urinish ishi bo‘yicha qariyb 200 kishi qo‘lga olindi
- Pandemiya bilan yashayotgan Turkiya — suratlarda
Izoh (0)