AQShda koronavirusdan vafot etganlar soni 300 mingdan oshdi

AQShda koronavirus infeksiyasi oqibatida 300 586 kishi vafot etdi, deb yozadi “RBK” Jons Hopkins universiteti ma’lumotlariga tayanib.

Olimlar hisob-kitoblariga ko‘ra, pandemiya boshidan buyon mamlakatda jami 16 milliondan ortiq kishi COVID-19’ga chalingan, bu esa AQShni kasallanganlar soni bo‘yicha dunyoda yetakchiga aylantiradi. Eng ko‘p kasallanganlar va vafot etganlar Kaliforniyada qayd etilgan — tegishli ravishda 525 486 va 8298 kishi.

Eslatib o‘tamiz, AQShda 14-dekabr, dushanba kuni koronavirusga qarshi emlash boshlandi, ba’zi shtatlarda esa bu jarayon 15-dekabrdan boshlanadi. Pfizer va BioNTech kompaniyalari tomonidan yaratilgan vaksinaning dastlabki dozalari dam olish kunlari butun mamlakat bo‘ylab tarqatilgan. AQShda 2020-yil yakuniga qadar taxminan 20 million kishini koronavirusga qarshi emlash rejalashtirilmoqda. 2021-yilning dastlabki ikki oyida esa bu raqam 100 million kishiga yetishi kerak.

11-dekabr kuni AQShda bir sutkada rekord darajada ko‘p odam — 231,7 ming kishida koronavirus aniqlangan edi. Shu munosabat bilan AQSh Oziq-ovqat mahsulotlari va dori vositalarini nazorat qilish boshqarmasi (FDA) Pfizer va BioNTech kompaniyalari tomonidan yaratilgan koronavirusga qarshi vaksinalardan foydalanishga ruxsat berdi.

Pfizer va BioNTech o‘zining BNT1622b vaksinasi tadqiqotlarning uchinchi bosqichi yakunlari bo‘yicha 95 foiz samaradorlik ko‘rsatganini ma’lum qilgandi. Taqqoslash uchun: Rossiyaning “Sputnik V” vaksinasi samaradorligi o‘z ishlab chiquvchilari tomonidan 92 foizga, Amerika Moderna kompaniyasi vaksinasi — 94,1 foizga, AstraZeneca kompaniyasi vaksinasi — 70 foizga baholangan.