Россия президенти Жо Байденни сайловдаги ғалаба билан табриклади

Россия президенти Владимир Путин Жо Байденни АҚШ президенти сайловларидаги ғалабаси билан қутлаб, табрик телеграммасини жўнатди, деб ёзади Meduza Кремлга таяниб.

Телеграммада Путин сайланган президентга муваффақиятлар тилаб, глобал хавфсизлик ва барқарорлик учун алоҳида масъул бўлган Россия ва АҚШ зиддиятларга қарамасдан, ҳозирги пайтда дунё тўқнаш келаётган кўплаб муаммо ва синовлар ҳал қилинишига ҳисса қўша олишига ишонч билдирди.

Эслатиб ўтамиз, АҚШда президентлик сайлови 2020 йилнинг 3 ноябрь куни бўлиб ўтди, овозлар бир неча кун давомида ҳисоблаб чиқилди, 7 ноябрь куни АҚШнинг йирик ОАВлари сайловда Байден ғалаба қозонганини маълум қилди. Дональд Трамп эса мағлубиятни тан олмади ва сайлов бўйича судга мурожаат қилишини билдирди. У сайловлар қонунбузарликлар билан ўтган деган фикрда, шунингдек, сайловларда мамлакат конституцияси бузилганини айтган.

Кўпчилик давлатлар раҳбарлари ўша заҳоти Байденни сайловдаги ғалабаси билан табриклади. Аммо Кремль расмий натижалар эълон қилинмагунича, Байденга қутлов юборишдан бош тортди. Путиннинг матбуот котиби Дмитрий Песков ўз баёнотида «расмий сайлов натижаларини кутиш ижобий бўларди», дея фикр билдирди. Брифингда журналистлар яна Песковга савол берганда, матбуот котиби «Россия президенти ким сайловда ғолиб бўлган бўлса, ўша шахсга ўз табригини йўллайди», — деб жавоб қайтарди.

15 декабрь куни сайловчилар ҳайъати кўпчилик овоз билан демократ Жо Байденни АҚШ президенти сайловларининг ғолиби дея тасдиқлади. Байденга 306 сайловчи, унинг рақиби, амалдаги АҚШ президенти Дональд Трампга 232 сайловчи овоз берди. Ғалаба учун 270 та овоз тўплаш керак — Байден ушбу маррадан сайловчиларнинг Калифорниядаги мажлисидан кейин ўтган эди. Овоз беришда 50 та штат ва Колумбия округидан жами 538 сайловчи қатнашди.

23 декабргача сайловчилар ҳайъати овозларидан иборат бюллетенлар Вашингтонга етказилади. 2021 йил 6 январь куни овозлар АҚШ Конгресси Вакиллар палатаси ва Сенатнинг қўшма мажлисида ҳисоблаб чиқилади. 20 январь куни сайланган президентнинг инаугурацияси бўлиб ўтади.