Toshkentda 18—21-dekabr kunlari bo‘lib o‘tadigan 2020-yilgi Yoshlar forumi doirasida blogerlar Aziza Qurbonova, Lazizbek Hamidov, Nikita Makarenko va Xushnudbek Xudoyberdiyev ishtirokida ochiq muloqot bo‘lib o‘tadi.
Tadbir tashkilotchilarining “Daryo”ga ma’lum qilishicha, uchrashuvda yoshlar o‘zlarining huquqiy bilimlari va media savodxonliklarini oshirib olishlari, shuningdek, o‘zlarini qiziqtirgan ko‘plab savollarga javob topishlari mumkin.
Ayni paytda Prezident administratsiyasida faoliyat olib borayotgan telejurnalist Aziza Qurbonovaning Telegram’dagi “Mikrofon ko‘targan ayol” kanalini 4,5 mingdan ziyod foydalanuvchi kuzatib boradi. Dizayner Lazizbek Hamidov esa YouTube’dagi salkam 15 ming obunachiga ega “Ular” loyihasi muallifi hisoblanadi.
Jurnalist va musiqachi Nikita Makarenkoning Telegram’dagi “Effekt Makarenko” shaxsiy kanaliga 21 mingdan ortiq foydalanuvchi obuna bo‘lgan. Hozirda O‘zA bosh direktorining o‘rinbosari lavozimida ishlayotgan huquqshunos Xushnudbek Xudoyberdiyev esa Telegram’dagi shaxsiy kanalida 300 mingdan ziyod obunachiga ega O‘zbekistondagi yagona bloger hisoblanadi.
Uchrashuv 19-dekabr 11:00 da Tashkent City Congress Hall’ning “Sag‘bon Darvoza” zalida bo‘lib o‘tadi. Tadbirda qatnashish uchun Toshkent yoshlar forumi uchun tashkil etilgan maxsus saytda ro‘yxatdan o‘tish lozim. Tadbirda ishtirok etish istagida bo‘lganlar soni chegaralangan.
Toshkent Yoshlar forumidan ko‘zlangan asosiy maqsad — ta’lim, sog‘liqni saqlash, madaniyat, sport, turizm, iqtisodiyot, bank-moliya, sud-huquq kabi ko‘plab sohalarda yosh iqtidorli kadrlarni izlab topish, ularni qo‘llab-quvvatlash va keng jamoatchilikka tanitish, yoshlarni yangi marralarga ilhomlantirish, malakasini oshirish, hukumat vakillari va turli soha rahbarlari bilan ochiq muloqotlarga kirishib, ularga o‘z taklif va tashabbusini namoyish etishiga yo‘l ochib berishdan iborat.
Izoh (0)