Farg‘ona vodiysidan Xorazmga aviaqatnov yo‘lga qo‘yiladi

Farg‘ona vodiysidan Xorazmga avia va temiryo‘l qatnovi tashkil etilib, dastlabki davrda ichki turizmni rivojlantirish maqsadida chipta narxlariga 30 foiz chegirma qo‘llanadi. Bu haqda Shavkat Mirziyoyev Xorazmga tashrifi yakunida Urganchda o‘tgan faollar yig‘ilishida ma’lum qildi, deb xabar bermoqda “Kun.uz”.

“Farg‘ona vodiysidan Xorazmga aviareys tashkil qilinadi. Kerak bo‘lsa, chiptalar narxiga 30 foizlik chegirma beriladi. Vodiy Xorazmni bilmaydi, Xorazm vodiyni bilmaydi. Chetdan kelmasa, o‘zimizda bor-ku.

Ziyorat turizmini bekorga gapirmadim. Hammada ichki talab paydo bo‘ldi. Xorazmiy, Pahlavon Mahmud, Buxoriy, Moturudiylar qayerda bor? Termiziylarni nega ziyorat qilmaymiz? Ziyoratni ko‘paytirib, ma’naviy ozuqa olishimiz kerak. 70 foiz xalqimiz Xivani ko‘rmagan.

Xivaning har bir xonadoniga eng arzon mehmonxonalar, xostellar qilib beramiz. Xivadagi har bir xonadon mehmon kutishga tayyor bo‘lish kerak. O‘tiraversak, hech kim bizga qilib bermaydi”, — deb ta’kidlagan davlat rahbari.

Davlat rahbari salohiyatli mamlakatlardan Urganchga doimiy va charter reyslar tashkil etish zarurligini qayd etgan. Vodiy viloyatlaridan Xorazmga avia va temiryo‘l qatnovini yo‘lga qo‘yib, dastlabki davrda chipta narxlariga chegirma berish tajribasi keyinchalik Termiz, Samarqand va Buxoro shaharlari bo‘yicha ham qo‘llaniladi.

Prezident, shuningdek, O‘zbekiston bo‘yicha shaxmatni rivojlantirish, Xorazmda yirik san’at saroyi qurish zarurligini ham aytib o‘tgan.

“Shaxmat bo‘yicha katta qaror qabul qilamiz. O‘zbekiston dunyo reytingida 30-o‘rinda. Yana ko‘tarish kerak. Xivada 2021-yilda yirik tadbir doirasida shaxmat turniri ham o‘tkaziladi.

Xorazmda yirik san’at saroyi yo‘q. San’atga chanqoq xalq, san’atkori ham Toshkentga borib konsert beradi, muxlislari ham borib keladi. 3 ta loyiha beringlar: 2021-yilda yo Urganch, yo Xivada reja qilamiz, 2022-yil qurilishni boshlaymiz”, — degan u.

Shavkat Mirziyoyev Xorazmda nefrologiya markazi ochish va kardiologiya markazini kengaytirish bo‘yicha ham ko‘rsatma bergan. Buning uchun zarur 3 million dollar mablag‘ bir oy ichida ajratilishi kutilmoqda.

Avvalroq Amudaryo ustida Xorazmni Qoraqalpog‘iston bilan bog‘laydigan ko‘prik, Xorazmda 2 ming xonadonli 100 ta ko‘p qavatli uy qurilishi haqida xabar berilgan edi.