O‘zbekistonning davlat tashqi qarzi 2020-yil boshiga nisbatan 18 foizga oshdi. Bu haqda Moliya vazirligi tomonidan e’lon qilingan O‘zbekiston Respublikasining davlat qarzi holati dinamikasi hisobotiga tayanib, “Gazeta.uz” xabar berdi.
Hisobotga ko‘ra, 2020-yil 1-oktabr holatiga O‘zbekiston nomidan va uning kafolati ostida jalb qilingan qarz qoldig‘i dastlabki hisob-kitoblarga ko‘ra 20,8 milliard dollar ekvivalentini yoki YaIMga nisbatan 36,8 foizni tashkil etgan.
Shu jumladan, davlatning tashqi qarzi 2,8 milliard dollarga yoki 2020-yil boshiga nisbatan 18 foizga oshib, 1-oktabr holatiga 18,5 milliard dollarga yoki YaIMga nisbatan 32,8 foizga yetdi.
Shundan:
- hukumat nomidan jalb qilingan tashqi qarz — 12,7 milliard dollar;
- hukumat kafolatlagan tashqi qarz — 5,8 milliard dollar.
Shundan:
- Hukumat nomidan jalb qilingan ichki qarz — 4,7 trillion so‘m (0,4 milliard dollar);
- Hukumat kafolatlagan ichki qarz — 18,9 trillion so‘m (1,9 milliard dollar).
Eslatib o‘tamiz, S&P Global Ratings xalqaro kredit reyting agentligi O‘zbekistonning uzoq va qisqa muddatli suveren kredit reytingi bo‘yicha navbatdagi hisobotini e’lon qildi. Unga ko‘ra, O‘zbekiston suveren kredit reytingi “BB-” darajasida saqlanib qolingan, biroq kelgusi davr uchun “salbiy” prognoz berilgan. Ushbu prognoz hukumatning tashqi qarzi tez sur’atlarda o‘sishda davom etishi mumkinligini aks ettiradi.
Moliya vazirligi tomonidan e’lon qilingan “2021-yilgi fuqarolar uchun budjet” loyihasida O‘zbekistonning jami davlat qarzi 2021-yil yakunida 28,4 milliard dollarga (YaIMga nisbatan 44,9 foiz) yetishi prognoz qilinmoqda. Moliya vazirligi esa buni xavfsiz darajada deb hisoblamoqda.
Izoh (0)