Ўзбекистоннинг давлат ташқи қарзи 2020 йил бошига нисбатан 18 фоизга ошди. Бу ҳақда Молия вазирлиги томонидан эълон қилинган Ўзбекистон Республикасининг давлат қарзи ҳолати динамикаси ҳисоботига таяниб, «Gazeta.uz» хабар берди.
Ҳисоботга кўра, 2020 йил 1 октябрь ҳолатига Ўзбекистон номидан ва унинг кафолати остида жалб қилинган қарз қолдиғи дастлабки ҳисоб-китобларга кўра 20,8 миллиард доллар эквивалентини ёки ЯИМга нисбатан 36,8 фоизни ташкил этган.
Шу жумладан, давлатнинг ташқи қарзи 2,8 миллиард долларга ёки 2020 йил бошига нисбатан 18 фоизга ошиб, 1 октябрь ҳолатига 18,5 миллиард долларга ёки ЯИМга нисбатан 32,8 фоизга етди.
Шундан:
- ҳукумат номидан жалб қилинган ташқи қарз — 12,7 миллиард доллар;
- ҳукумат кафолатлаган ташқи қарз — 5,8 миллиард доллар.
Шундан:
- Ҳукумат номидан жалб қилинган ички қарз — 4,7 триллион сўм (0,4 миллиард доллар);
- Ҳукумат кафолатлаган ички қарз — 18,9 триллион сўм (1,9 миллиард доллар).
Эслатиб ўтамиз, S&P Global Ratings халқаро кредит рейтинг агентлиги Ўзбекистоннинг узоқ ва қисқа муддатли суверен кредит рейтинги бўйича навбатдаги ҳисоботини эълон қилди. Унга кўра, Ўзбекистон суверен кредит рейтинги «ББ-» даражасида сақланиб қолинган, бироқ келгуси давр учун «салбий» прогноз берилган. Ушбу прогноз ҳукуматнинг ташқи қарзи тез суръатларда ўсишда давом этиши мумкинлигини акс эттиради.
Молия вазирлиги томонидан эълон қилинган «2021 йилги фуқаролар учун бюджет» лойиҳасида Ўзбекистоннинг жами давлат қарзи 2021 йил якунида 28,4 миллиард долларга (ЯИМга нисбатан 44,9 фоиз) етиши прогноз қилинмоқда. Молия вазирлиги эса буни хавфсиз даражада деб ҳисобламоқда.
Изоҳ (0)