O‘zbekiston Prezidenti Shavkat Mirziyoyev 11-dekabr kuni Ozarbayjon prezidenti Ilhom Aliyev bilan telefon orqali muloqot qildi. Bu haqda Prezident matbuot xizmati xabar berdi.
O‘zbekiston rahbari Ozarbayjon prezidentini Tog‘li Qorabog‘da harbiy harakatlar yakunlangani bilan samimiy tabriklab, birodar mamlakatning do‘st xalqiga tinchlik va ravnaq tiladi. Tomonlar Janubiy Kavkazning butun hududida xavfsizlik va barqarorlik ta’minlanishiga umid bildirdi.
Suhbatda ko‘p qirrali O‘zbekiston—Ozarbayjon munosabatlarining bugungi holati va ularni yanada rivojlantirish istiqbollari muhokama qilindi.
Pandemiya bilan bog‘liq mushkul davrda mamlakatlar bir-birini qo‘llab-quvvatlagani, bu esa ikki davlat o‘rtasidagi ko‘p asrlik do‘stlik va strategik hamkorlikning navbatdagi namoyoni bo‘lgani katta mamnuniyat bilan qayd etildi.
Davlat rahbarlari o‘zaro savdo hajmini oshirish, sanoat va qishloq xo‘jaligi, energetika, transport va logistika, turizm va boshqa sohalarda yetakchi korxonalarning kooperatsiyasini kengaytirishga qaratilgan qo‘shma dastur va loyihalarni faol ilgari surish muhimligiga alohida to‘xtaldi. Tomonlar hududlararo va madaniy-gumanitar almashinuvlarni jadal davom ettirishga tayyor ekanliklarini tasdiqladi.
Suhbat yakunida O‘zbekiston va Ozarbayjon prezidentlari global va mintaqaviy tuzilmalar doirasidagi yaqin muloqotni qo‘llab-quvvatlashga kelishib oldi, shuningdek, bo‘lajak oliy darajadagi ikki va ko‘p tomonlama tadbirlar rejasini ko‘rib chiqdi.
Eslatib o‘tamiz, 27-sentabrda Tog‘li Qorabog‘da harbiy harakatlar boshlanganidan keyin O‘zbekiston Tashqi ishlar vazirligi Ozarbayjon va Armaniston munosabatlaridagi keskinlikning oshishi O‘zbekistonda jiddiy tashvish uyg‘otayotganligini bildirib, bayonot bergandi. O‘zbekiston tashqi siyosat idorasi Ozarbayjon va Armanistonni harbiy harakatlarni tezda to‘xtatishga hamda mojaroni suverenitet va hududiy yaxlitlik tamoyillariga rioya qilgan holda tinch yo‘l bilan bartaraf etish maqsadida diplomatik muzokaralarni boshlashga chaqirgandi.
Izoh (0)