Turkiya politsiyasi 8-dekabr kuni 2016-yilda amalga oshirilgan davlat to‘ntarishiga urinishga aloqadorlikda gumonlanayotgan 198 kishini qo‘lga oldi. Bu haqda “Interfaks” xabar berdi.
Ma’lum qilinishicha, qo‘lga olinganlar orasida oddiy fuqarolar va harbiy xizmatchilar bor.
Maxsus politsiya operatsiyasi Izmir Bosh prokuraturasi tomonidan 304 kishini, shu jumladan, mamlakatning 50 ta provinsiyasida 285 nafar amaldagi harbiy xizmatchini qo‘lga olish haqidagi order berganidan keyin amalga oshirilgan.
Eslatib o‘tamiz, Turkiyada 2016-yilning 16-iyuliga o‘tar kechasi isyonchilar harbiy davlat to‘ntarishini amalga oshirishga urinib ko‘rdi. Asosiy to‘qnashuvlar Anqara va Istanbul shaharlarida bo‘lib o‘tdi. 250 dan ortiq fuqaro halok bo‘lgan, ikki mingdan ortiq odam jarohat olgan. Isyon bostirilgan.
Keyinroq Turkiyada 50 mingdan ortiq odam hibsga olingan, 160 mingdan ortiq davlat xizmatchisi, shu jumladan, harbiylar ishdan bo‘shatilgan yoki chetlatilgan.
Turkiya hukumati FETO muxolifat tashkiloti yetakchisi Fathulloh Gulenni davlat to‘ntarishiga aloqadorlikda ayblagan. AQShda yashaydigan Gulenning o‘zi esa davlat to‘ntarishini qoralagan va ayblovlarni rad etgan.
Izoh (0)