Turkiya hukumati Fathulloh Gulenga yordam berayotgan mamlakatlarni dushmanga tenglashtirdi
Rasmiy Anqara mamlakatda 16-iyulga o‘tar kechasi yuz bergan harbiy to‘ntarish Fathulloh Gulen tomonidan uyushtirilgan deb hisoblamoqda; uni yashirayotgan har qanday mamlakat o‘zini Turkiyaga do‘st deb hisoblay olmaydi. Mazkur bayonot, “Interfaks” xabariga ko‘ra, Turkiya bosh vaziri Binali Yildirim tomonidan berilgan.
Turkiya prezidenti Rajab Toyyib Erdo‘g‘onning azaliy raqibi hisoblan Fathulloh Gulen 1990-yillarning oxiridan beri AQShda istiqomat qiladi. Hurriyet nashrining yozishicha, rasmiy Anqara mazkur bayonoti bilan AQShga o‘ziga xos signal yo‘llamoqda.
“Terrorchilarning yetakchisi hisoblangan bu odamni, ayniqsa kechagi voqealardan so‘ng, qanday mamlakat qo‘llab-quvvatlashi mumkinligini aqlimga sig‘dira olmayman. Uni qo‘llab-quvvatlaydigan mamlakat Turkiyaning do‘sti emasligi aniq. Bu Turkiyaga qarshi dushmanona qadamdir”, — dedi Turkiya hukumati rahbari.
Yildirimning ta’kidlashicha, Turkiya avval ham Gulenni ekstraditsiya qilish haqida so‘rov yo‘llagan. Sobiq imom hisoblangan Gulenning o‘zi esa harbiy to‘ntarishga urinishga aloqadorligi haqidagi ayblovlarni rad etib, to‘ntarish tarafdorlarini qat’iy qoralagan edi.
