Armaniston prezidenti Arman Sarkisyan Rossiya prezidenti Vladimir Putindan Armaniston va Ozarbayjon o‘rtasidagi chegaralarni demarkatsiya qilish jarayonini qo‘llab-quvvatlashni so‘radi. Tegishli maktub Arman Sarkisyan tomonidan Rossiya prezidentiga yuborildi, deb xabar bermoqda “RBK”.
“Armaniston prezidenti, afsuski, demarkatsiya masalasi sababli tomonlar o‘rtasida yangi bahslarning yuzaga kelish xavfi mavjudligini ta’kidladi”, — deyiladi Armaniston prezidenti matbuot xizmati xabarida.
Qayd etilishicha, mazkur masalaning dolzarbligi va o‘ta muhimligini inobatga olgan holda, voqealarning salbiy rivoji va tarangliklarning oldini olish maqsadida Sarkisyan Putindan Armaniston va Ozarbayjon o‘rtasidagi demarkatsiya jarayonini yakunlashda yordam ko‘rsatishni so‘ragan.
Armaniston prezidenti Putinga Tog‘li Qorabog‘dagi jangovar harakatlarni va o‘t ochishni to‘xtatishga xizmat qilgan urinishlar uchun yana bir marta minnatdorlik bildirgan.
Avvalroq Armaniston bosh vaziri Nikol Pashinyan arman-ozar chegarasida front chizig‘i bo‘lishi kerak emasligini aytgan. “Bizning qurolli kuchlarimiz chegara bo‘ylab joylashtiriladi. Bu jarayon odamlar ongida muammoni yuzaga keltiradi. Amaliy xususiyatdagi boshqa muammolar ham bor, biroq ular hal qilib bo‘lmaydigan muammolar emas va biz ularning yechimi ustida ishlayapmiz. Bizning keyingi harakatlarimiz haqiqiy chegarani shakllantirishga qaratilishi lozim, front chizig‘ini emas va biz shu yo‘ldan ketishimiz kerak”, — degan Pashinyan.
Izoh (0)